Исроил президенти Ицхак Герцог ҳукуматни мамлакатда оммавий норозиликларга сабаб бўлган суд-ҳуқуқ ислоҳотини тўхтатишга чақирди.
“Мен бош вазирга, ҳукуматга ва коалиция аъзоларига мурожаат қиламан: ҳиссиётлар оғир ва оғриқли. Одамлар қаттиқ безовта. Хавфсизлик, иқтисодиёт, жамият — ҳамма нарса хавф остида. Исроил халқининг нигоҳи сизга қадалган”, — деди Герцог намойишлар авж олгандан кейин.
26 март куни Исроил бош вазири Биньямин Нетаньяху суд-ҳуқуқ ислоҳотларини танқид қилган мудофаа вазири Ёав Галлантни ишдан бўшатди, шундан сўнг ўтган тунда мамлакатда янги норозилик намойишлари бошланди.
Нетаньяху ислоҳотларни музлатиш имконияти ҳақида 27 март куни эрталаб соат 5:00 гача давом этган муҳокамада иштирок этди, эндиликда унинг омма олдида нутқ сўзлаши кутилмоқда.
Халқ суд ислоҳотига қарши норозилик билдирмоқда
Декабрь ойи охирида Исроилда янги ҳукумат қасамёд қилган эди. Бир ярим йил мухолифатда бўлганидан сўнг бош вазирлик лавозимига қайтган Нетаньяху Вазирлар Маҳкамасининг 33 аъзосини таништирди, улар орасида ўнгчи националист диний коалициядан ҳам вакиллар бор.
Адлия вазирлиги раҳбари Ярив Левин томонидан таклиф қилинган суд-ҳуқуқ ислоҳоти янги Вазирлар Маҳкамасининг энг резонансли ташаббусларидан бири бўлди. Унинг фикрича, Олий суд ваколатлари қонун ва ҳукумат қарорлари билан чекланади, Вазирлар Маҳкамаси судьяларни танлаш устидан назоратни ҳам ўз қўлига олади. Шундай қилиб, бирор қонун ҳатто Олий суд томонидан мамлакат конституциясига зид деб топилса ҳам, парламент уни қабул қилиш имкониятига эга бўлади.
Мухолифатчилар бу ислоҳот Исроилнинг демократик қадриятларига таҳдид солади, деб ҳисобламоқда. Мамлакатда оммавий норозилик намойишлари бошланди.
Нетаньяху норозилик намойишларини мухолифатнинг унинг сайловлардаги ғалабасини тан олишдан бош тортиши деб атади. Январь ойи охирида у резонансга қарамай, ислоҳот амалга оширилишини эълон қилди.
Изоҳ (0)