Rossiya bosqinida “Ukrainaga yomon munosabatda bo‘lgan” davlatlar urush tugagandan so‘ng javobgarlikni o‘z zimmasiga oladi. Bu haqda tashqi ishlar vaziri Dmitriy Kuleba BBC’ga bergan intervyusida ma’lum qildi.
Uning so‘zlariga ko‘ra, Rossiyaning Ukrainaga qarshi urushi boshlanganidan keyin har bir davlatning qilgan tanlovi kelajakdagi munosabatlarni qurishda inobatga olinadi. U Kiyev G‘arbdan harbiy va moliyaviy yordam olsa-da, Afrika, Osiyo va Janubiy Amerikaning ko‘plab davlatlari chetda qolganini aytdi. Kuleba hozir Ukrainani qo‘llab-quvvatlamagan va “bu urushda o‘zini yomon tutgan va Ukrainaga yomon munosabatda bo‘lgan” davlatlar kelajakda buning uchun tovon to‘lashini aytdi.
“Agar dunyoda kimdir u yoki bu davlat Ukrainaga o‘z tarixining eng qorong‘u damlarida qanday munosabatda bo‘lgani kelajakdagi munosabatlarni qurishda hisobga olinmaydi, deb o‘ylasa, bu odamlar diplomatiya qanday ishlashini bilmaydi. Urush — bu tanlov qilish vaqti va har bir tanlov qayd etildi”, — dedi Kuleba.
Vazirning qo‘shimcha qilishicha, hozir Ukraina harbiy va iqtisodiy jihatdan G‘arb yordamiga bog‘liq bo‘lishi mumkin, ammo tinchlik davrida mamlakatning g‘alla eksporti katta hajmga ega. Dmitriy Kuleba G‘arb Ukrainani yetarlicha tez qurol bilan ta’minlamayotgani, chunki ular katta urushga tayyor bo‘lmaganiga to‘xtaldi.
“Biroq Ukraina Qurolli kuchlari, ayniqsa Donetsk viloyatining Baxmut hududida o‘q-dorilarga muhtoj. Biz hamkorlardan tezroq harakat qilishni so‘raymiz. Agar yetkazib berish bir kunga kechiktirilsa, bu kimdir frontda halok bo‘lishini anglatadi”, — dedi u.
Izoh (0)