Ukraina prezidenti Vladimir Zelenskiy urushning bir yilligi munosabati bilan o‘tkazilgan matbuot anjumanida BMTning Ukraina bo‘yicha rezolyutsiyasini qo‘llab-quvvatlamagan davlatlarga munosabat bildirdi. Bu haqda “Fokus.ua” xabar berdi.
Siyosatchi urush oqibatlari nafaqat hududlarni, balki tirik odamlarni ham yo‘qotishga olib kelishini qayd etdi.
“Ehtimol, jang qilmasangiz va yo‘qotmasangiz, nima bo‘layotganini, bu har bir kishi uchun qanchalik og‘riqli ekanini tushunish juda qiyin”, — dedi Ukraina prezidenti.
U urushdagi ma’lumotlarni yetkazish qiyinligini aytib, shuning uchun jurnalistlar bilan yaqindan ishlar olib borilayotganini ta’kidladi. Siyosatchi chetda turib, urush qanday ketayotganiga ishonchsizlik bilan gapirish zaif pozitsiyani egallash hisoblanishini qayd etdi.
“Nahotki urush va yo‘qotishlar, urush va qiynoqlar, urush va zo‘rlash haqiqatan ham kerak? Odamlar qonli urush oqibatlarini baholashi uchun u haqiqatan ham dunyodagi har bir xonadonga kirishi kerakmi? Shuning uchun diplomatiya va jurnalistika vaziyatni to‘g‘ri yetkazish maqsadida faoliyat yuritadi. Rezolyutsiyaga qarshi bo‘lganlarga buni tushuntirish qiyin, ammo biz harakat qilamiz. Ha, BMTning Ukraina bo‘yicha rezolyutsiyasiga qarshi bo‘lgan oltita davlat bor. 141 ta mamlakat uni qo‘llab-quvvatladi”, — dedi u.
Zelenskiy Ukraina Afrika qit’asi mamlakatlari tomon qadam tashlashi kerakligini aytib, mustaqillik yillarida Kiyev bu yo‘nalishga e’tibor bermaganini katta xato deb atadi.
“Ukraina bu urushdan oldin kuchli sheriklarga ega emas edi va bu haqiqat. Hozir bo‘lganidan xursandman, lekin to‘liq emas. Afrika qit’asi, Lotin Amerikasi yetishmayapti. Men ular bilan uchrashuv o‘tkazmoqchiman. Buning uchun kecha-yu kunduz ishlashga tayyormiz va mustaqillikning 30 yilida mana shunday qilish kerak edi”, — dedi u.
BMT Bosh Assambleyasi Ukrainadagi urushning bir yilligi munosabati bilan Ukraina va uning ittifoqchilari tomonidan taklif etilgan, Rossiyani Ukraina hududidagi harbiy harakatlarni to‘xtatish va u yerdan qo‘shinlarni olib chiqishga chaqiruvchi rezolyutsiyani qo‘llab-quvvatladi. Rezolyutsiyani qabul qilish uchun 141 davlat ovoz berdi. Yana 32 ta davlat, jumladan, O‘zbekiston ovoz berishda betaraf qoldi. Yetti davlat – Rossiya, Belarus, Suriya, Shimoliy Koreya, Eritreya, Nikaragua va Mali hujjatga qarshi ovoz berdi.
Izoh (0)