Россия босқинида “Украинага ёмон муносабатда бўлган” давлатлар уруш тугагандан сўнг жавобгарликни ўз зиммасига олади. Бу ҳақда ташқи ишлар вазири Дмитрий Кулеба BBC’га берган интервьюсида маълум қилди.
Унинг сўзларига кўра, Россиянинг Украинага қарши уруши бошланганидан кейин ҳар бир давлатнинг қилган танлови келажакдаги муносабатларни қуришда инобатга олинади. У Киев Ғарбдан ҳарбий ва молиявий ёрдам олса-да, Африка, Осиё ва Жанубий Американинг кўплаб давлатлари четда қолганини айтди. Кулеба ҳозир Украинани қўллаб-қувватламаган ва “бу урушда ўзини ёмон тутган ва Украинага ёмон муносабатда бўлган” давлатлар келажакда бунинг учун товон тўлашини айтди.
“Агар дунёда кимдир у ёки бу давлат Украинага ўз тарихининг энг қоронғу дамларида қандай муносабатда бўлгани келажакдаги муносабатларни қуришда ҳисобга олинмайди, деб ўйласа, бу одамлар дипломатия қандай ишлашини билмайди. Уруш — бу танлов қилиш вақти ва ҳар бир танлов қайд этилди”, — деди Кулеба.
Вазирнинг қўшимча қилишича, ҳозир Украина ҳарбий ва иқтисодий жиҳатдан Ғарб ёрдамига боғлиқ бўлиши мумкин, аммо тинчлик даврида мамлакатнинг ғалла экспорти катта ҳажмга эга. Дмитрий Кулеба Ғарб Украинани етарлича тез қурол билан таъминламаётгани, чунки улар катта урушга тайёр бўлмаганига тўхталди.
“Бироқ Украина Қуролли кучлари, айниқса Донецк вилоятининг Бахмут ҳудудида ўқ-дориларга муҳтож. Биз ҳамкорлардан тезроқ ҳаракат қилишни сўраймиз. Агар етказиб бериш бир кунга кечиктирилса, бу кимдир фронтда ҳалок бўлишини англатади”, — деди у.
Изоҳ (0)