АҚШ Мудофаа вазири Ллойд Остин Киев иттифоқчиларини Россиянинг урушни чўзишига йўл қўймаслик учун қурол етказиб беришни тезлаштиришга чақирди. Вазир бу ҳақда Украина мудофаасига оид алоқа гуруҳи йиғилиши якунлари бўйича ўтказилган матбуот анжуманида гапирди.
“Украина беҳуда вақт йўқотолмайди. Алоқа гуруҳидаги ҳамкасбларимиз ҳам зиммамиздаги мажбуриятларни, жумладан, зирҳли техникаларимизни жанг майдонига етказиш ва украиналик аскарларни тегишли тайёргарликдан ўтказишни тез ва тўлиқ бажаришимиз кераклигини тушунади. Шунингдек, биз имкон қадар тезроқ янги тизимлардан фойдаланиш учун зарур бўлган эҳтиёт қисмларини етказиб бериш ва техник хизмат кўрсатишни ташкиллаштиришимиз керак”, — деди Остин.
Вазирнинг қўшимча қилишича, учрашув якунида гуруҳ аъзолари Украинани қўллаб-қувватлашни давом эттириш қатъиятини тасдиқлаган. Хусусан, у Швеция Украинага 10 та Леопард танки ва ҳаво ҳужумидан мудофаа учун асосий компонентлар етказиб бермоқчилигини айтди. Ўз навбатида, Норвегия АҚШ билан биргаликда Киевга иккита NASAMS зенит ракеталари тизимини топширади.
Остиннинг таъкидлашича, Россия урушда ғалаба қозонишга интилмоқда, аммо бунинг учун ресурслари йўқ.
“Россия Эрон ва Шимолий Кореяга таянишга мажбур бўлмоқда, рус армиясининг эса Иккинчи жаҳон уруши қуролларидан фойдаланишига тўғри келмоқда. Россиянинг ҳарбий мулки ва дўстлари тугаб бормоқда. Шу билан бирга, Владимир Путин бир йиллик урушда Қўшма Штатлар ва Алоқа гуруҳи Украинани узоқ муддатда қўллаб-қувватлашга тайёр эканини кўрган бўлса керак. Путин ҳамон Украинанинг тинкасини қуритишга ва бизни чарчатишга умид қилмоқда, аммо биз ҳам таслим бўлмаймиз”, — деди у.
2022 йилнинг кузида Россия армияси Эронда ишлаб чиқарилган Shahed-131/136 камикадзе дронларидан фаол фойдалана бошлади, улар Россияда Геран-1 ва Геран-2 деб номланди.
2023 йил февралида Эрон Россияга кўп марта фойдаланиш мумкин бўлган узоқ масофали ҳужумчи дронлар партиясини топширгани маълум бўлди. Март ойида Financial Times газетаси Эрон россиялик ҳарбийларни баллистик ракеталар билан таъминлашни бошлашга тайёрлигини ёзганди, бироқ нашрга кўра, Россия ҳозиргача бундай харидлардан ўзини тийган, чунки у Қўшма Штатлар бунга жавобан Украинага ATACMS узоқ масофали ракеталарни етказиб бера бошлашидан қўрқмоқда.
Шунингдек, Америка разведкаси маълумотларига кўра, Россия ўз заҳираларининг тугаши туфайли Шимолий Кореядан артиллерия снарядлари, қисқа ва ўрта масофали ракеталарни фаол равишда сотиб олган. Россия расмийлари бу хабарларни “Ғарб ОАВларининг уйдирмаси” деб атади.
Изоҳ (0)