АҚШ собиқ етакчиси Дональд Трампнинг бўлажак сайловларда АҚШ президентлигига Республикачилар партиясидан номзод сифатида кўрсатилиши Вашингтоннинг Киевга давомий ёрдам кўрсатишини қийинлаштиради. НАТО собиқ бош котиби Андерс Фог Расмуссен Politico журналистларига берган интервьюсида шундай фикр билдирди.
“Агар Трамп (АҚШ президентлигига) номзод сифатида кўрсатилса, мен буни геосиёсий фалокат деб атайман, чунки сайловолди компаниясида унинг таъсири ҳалокатли бўлади”, — деди Расмуссен.
Унинг фикрича, АҚШда ўтказилган сўров натижалари америкаликлар орасида “Украинани қўллаб-қувватлаш кучсизлашганидан” далолат беради. Агар Трамп Республикачилар партиясидан президентликка номзод бўлса, бу жараён тезлашади.
“Унинг ғоялари Америка жамиятининг маълум қисми учун жозибадорлигининг ўзи Америка сиёсатини нотўғри йўналишга бошлайди”, — дейди Расмуссен.
НАТО собиқ бош котибининг сўзларига кўра, Трамп АҚШнинг Украина бўйича бундай курсини қўллаб-қувватлайди, бу эса “таслим бўлиш”га айланади. Расмуссен республикачилар бўлажак президентлик сайловларида “АҚШнинг жаҳон сиёсатидаги етакчи ролига Трампдан кўра кўпроқ муносиб номзодни кўрсатишига” умид билдирди.
Politico материалида қайд этилишича, Расмуссен “Украина ҳукуматининг маслаҳатчиси” ва Киев манфаатлари йўлида лоббичилик қилади. У Вашингтон маъмурияти ва АҚШ қонунчиларидан Украинага ҳарбий ёрдам кўрсатиш ҳамда унга “узоқ муддатли хавфсизлик кафолатлари” беришни сўрамоқда.
АҚШда навбатдаги президентлик сайлови 2024 йилнинг ноябрь ойига белгиланган. Трамп 2022 йилнинг ноябрида давлат раҳбари лавозими учун курашга тайёрлигини эълон қилганди. АҚШнинг БМТдаги собиқ элчиси Никки Хейли ҳам Республикачилар партиясидан президентликка номзодини қўйиши маълум қилинди.
Американинг амалдаги раҳбари Жо Байден қайта сайланишга умид қилаётганини билдирган бўлса-да, ҳали номзодини расман илгари сургани йўқ.
Изоҳ (0)