“O‘zbekkimyomash zavodi”ning ustav kapitalidagi 44,71 foiz aksiyalar paketi Niderlandiya kompaniyasiga sotildi. Bu haqda “UzAssets investitsiya kompaniyasi” xabar berdi.
Tegishli xususiylashtirish dasturlariga muvofiq, UzAssets’ning “O‘zbekkimyomash zavodi” ustav kapitalidagi 44,71 foiz aksiyalar paketini 37 mlrd so‘mga Tropidia Holding B.V.’ga sotish bo‘yicha kelishuvga erishildi.
UzAssets 2021-yil 25-avgustda “O‘zbekkimyomash” aksiyadorlik jamiyatidagi davlat ulushini sotishini ma’lum qilgan edi. Jarayonda Deloitte xalqaro kompaniyasi xususiylashtirish bo‘yicha konsultant bo‘lib, Dentons xalqaro kompaniyasi huquqiy masalalarda ko‘maklashgan.
Natijada investorlardan sotib olish bo‘yicha qiziqish to‘g‘risidagi 5 ta ariza (Express of Interest) kelib tushgan.
Kompaniya haqida
“O‘zbekkimyomash” zavodiga 1941-yilda asos solingan. U issiqlik almashinuvi uskunalari, nasoslar, turbokompressorlar, ustunlar va tanklar apparatlarini, shuningdek, murakkab metall konstruksiyalarni loyihalash, ishlab chiqarish va texnik xizmat ko‘rsatishga ixtisoslashgan.
Shuningdek, korxona elektr energiyasi, tabiiy gaz, karbonat angidrid, kislorod bo‘yicha ulkan ta’minot quvvatiga, shuningdek temir yo‘l liniyalarining tayyor yo‘laklariga ega — Chirchiq stansiyasidan 5,9 km uzoqlikda, yuk ko‘tarish quvvati — 250 vagon/oyiga 10 ming tonna.
Bundan tashqari, Korxona “Navoiyazot”, Navoiy va Olmaliq kon-metallurgiya kombinatlari, “MaksamChirchiq” va boshqa bir qator jamiyatlar uchun ehtiyot qismlarni yetkazib beruvchi hisoblanadi.
Izoh (0)