Polsha, Litva va Estoniya hukumati Yevropa Ittifoqining qolgan a’zolariga Rossiya neft narxiga chegarani bir barrel uchun 60 dollardan 51,45 dollarga tushirishni taklif qildi. Bu haqda Bloomberg xabar berdi.
Ma’lumotlarga ko‘ra, yanvar oyida Rossiyaning neft sotishdan tushgan daromadi 13 milliard dollarni tashkil etgan.
Uch davlat vakillarining fikriga ko‘ra, taklif Rossiyaning neft eksportidan tushadigan daromadlarini oyiga 650 million dollarga kamaytiradi, chunki qaror amalga oshirilsa Uralsning bir barrel narxi mavjud bozor narxlaridan 5 foizga pasayadi.
Varshava va Vilnyus Rossiya nefti narxini 51,45 dollargacha pasaytirish tarafdori ekanligi haqida Polshaning RMF FM radiosi ham manbalarga tayanib xabar berdi.
Polsha diplomatlari bir barrel neft uchun amaldagi 60 dollar chegarasini Rossiya uchun juda foydali deb hisoblamoqda.
Rossiya Moliya vazirligi ma’lumotlariga ko‘ra, 2023-yil yanvar—fevral oylarida Urals neftining o‘rtacha narxi bir barrel uchun 49,52 dollarni, fevralda 49,56 dollarni tashkil etdi.
G‘arb davlatlari tomonidan Rossiyada ishlab chiqarilgan neft narxini bir barrel uchun 60 dollargacha cheklash 5-dekabrdan kuchga kirdi.
Narxlar chegarasi G7 mamlakatlari (AQSH, Buyuk Britaniya, Germaniya, Fransiya, Kanada, Italiya va Yaponiya), shuningdek, Avstraliya va Yevropa Ittifoqi tomonidan tasdiqlangan. Keyinchalik shartnomaga Norvegiya va Shveysariya qo‘shildi.
Avvalroq Putin o‘zining ruxsatisiz neft mahsulotlarini yuqori narx chegarasida eksport qilishni taqiqlagani haqida xabar berilgandi.
Izoh (0)