O‘zbekistonda pomidor rekord darajada qimmatlashdi, narx pasayishi kutilmayapti

O‘zbekistonda issiqxona pomidorlari narxi har hafta rekordlarni yangilab, tez o‘sib bormoqda. Oxirgi oyda ularning ulgurji narxi o‘rtacha bir yarim baravarga, yil boshidan beri esa deyarli 70 foizga oshdi. Bu haqda EastFruit xabar berdi.

Bozor ishtirokchilarining fikricha, buning asosiy sababi yanvar oyidagi anomal sovuq paytida issiqxonalarda hosilning katta yo‘qotilishidir.

2023-yil yanvar oyining ikkinchi o‘n kunligida issiqxonadagi qizil dumaloq pomidorning o‘rtacha narxi 12 ming so‘mdan 19 ming so‘m/kg ga oshdi, ya’ni ikki hafta ichida o‘sish 27 foiz. Oyning oxirida ob-havo sharoiti yaxshilandi va narx barqarorlashdi.

3-fevraldan 10-martgacha dumaloq qizil issiqxona pomidorining o‘rtacha ulgurji narxi 18 ming so‘mdan 27 ming so‘m/kg ga, ya’ni 50 foizga oshdi.

Natijada joriy yil boshidan 10-martgacha ushbu mahsulotlarning ulgurji narxlari 80 foizga oshgan.

2023-yil 10-mart holatiga ko‘ra, O‘zbekistonda qizil dumaloq issiqxona pomidorining o‘rtacha ulgurji narxi o‘tgan yilning shu sanasiga nisbatan 1,5 baravar va 2021-yilning shu sanasiga nisbatan qariyb 2 baravar yuqori bo‘ldi.

Yanvar va fevral oyining birinchi o‘n kunligida pushti issiqxona pomidorining narxi nisbatan barqaror bo‘lgan bo‘lsa-da, so‘nggi bir oy ichida ular keskin oshgan.

10-fevraldan 10-martgacha pushti pomidorning o‘rtacha ulgurji narxi 20 ming so‘mdan 33 ming so‘m/kgga ya’ni bir oyda 65 foizga oshgan.

2023-yil 10-mart holatiga ko‘ra, O‘zbekistonda pushti pomidorning o‘rtacha ulgurji narxi o‘tgan yilning shu sanasiga nisbatan 2,8 baravar va 2021-yilning shu sanasiga nisbatan 2,2 baravar yuqori bo‘ldi.

O‘zbekiston meva-sabzavotlarining yirik eksportchisi GDF Exsport kompaniyasining tijorat direktori Husan Haydarovga ko‘ra, yanvar oyidagi anomal sovuq O‘zbekistonda yangi pomidor narxining tez oshishiga asosiy katalizator bo‘ldi.

Ayoz paytida ko‘plab issiqxona majmualarida gaz bosimi sezilarli darajada pasaydi, chunki bu davrda butun mamlakat bo‘ylab tabiiy gaz tanqisligi mavjud edi. Shunga ko‘ra, bu issiqxonalarda harorat keskin tushib ketdi va o‘rtacha 50 foizdan 70 foizigacha pomidor ekinlari nobud bo‘ldi, — deydi  Xusan Haydarov.

Eng ko‘p yo‘qotishlar Surxondaryo, Qashqadaryo, Samarqand va Toshkent viloyatlari hamda Farg‘ona vodiysidagi issiqxonalarda kuzatildi.

Ekspertga ko‘ra, yaqin kelajakda O‘zbekistonga arzonroq narxlarda pomidor import qilinmasa, ushbu mahsulotning narxi sezilarli darajada pasayishi qiyin.