Rossiya kompaniyasi “Elektrqishloqqurilish”ning 58,4 foiz aksiyasini xususiylashtirdi

“Elektrqishloqqurilish”ning 58,41 foiz aksiyalar paketi Rossiya kompaniyasiga sotildi. Bu haqda “UzAssets investitsiya kompaniyasi” xabar berdi.

Tegishli xususiylashtirish dasturlariga muvofiq, “UzAssets”ning “Elektrqishloqqurilish” ustav kapitalidagi 58,41 foiz aksiyalar paketi 93,2 mlrd so‘mga “Uralskaya energeticheskaya stroitelnaya kompaniya”ga sotish bo‘yicha kelishuvga erishildi.

“UzAssets” 2021-yil 19-noyabrda “Elektqishloqqurilish” aksiyadorlik jamiyati davlat ulushini sotuvga qo‘ygan. 

Bunda Grant Thornton xalqaro konsalting kompaniyasi xususiylashtirish bo‘yicha konsultant sifatida jalb etilgan va Dentons xalqaro yuridik kompaniyasi huquqiy masalalarda ko‘maklashgan.

Ma’lumotlarga ko‘ra, jami investorlardan aktivni sotib olishga qiziqish bildirish bo‘yicha 7 ta so‘rov kelib tushgan. 

Talabgorlar xususiylashtirish jarayonida ishtirok etishini ta’qiqlashi mumkin bo‘lgan ma’muriy, hakamlik yoki boshqa sud jarayonlarining yo‘qligi hamda Yevropa Ittifoqi va AQSHning, shuningdek yirik xalqaro moliya institutlarining sanksiyalari ro‘yxatiga kiritilmaganligi yuzasidan o‘rganilgan.

Eng yaxshi majburiyatga ega bo‘lgan taklif UESK tomonidan taqdim etilgan. “UzAssets” kompaniya kelajakda “Elektrqishloqqurilish”ning barqaror rivojlanishini ta’minlashini hamda turli kuchlanishga ega elektr tarmoqlari obyektlarini qurish bo‘yicha O‘zbekistonning yirik sanoat korxonalaridan biri bo‘lishini kutmoqda.