“Дарё” нашри 16 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россияга қарши ҳужум бошланиш арафасида
Украина аввалдан айтиб келинган баҳорги қарши ҳужумга тайёргарликни бошлади. Айни пайтда АҚШ ва бошқа ғарб давлатлари Украинага ёрдам беришга эътибор қаратган.
Politico қайд этишича, Украинага Ғарбнинг юзлаб танклари ва зирҳли техникалари, снарядлар, кўприклар қуришга мўлжалланган махсус техникалар юборилмоқда.
Бундан ташқари, Украина армиясининг 600 нафар ҳарбийси яқинда тиббий ёрдам кўрсатиш, ўт очиш, жанговар зирҳли машиналарни бошқариш бўйича машғулотларни якунлади.
Қарши ҳужум май ойида бошланиши мумкин аммо Киев ҳали стратегия борасида бир қарорга келмаган. Таҳлилга кўра унда иккита вариант бор. Биринчиси — Херсон орқали Қримга силжиш, иккинчиси — шимолий позициясидан шарққа силжиш.
Россия Днепр дарёсининг шарқий қирғоғида ўз мудофаасига мустаҳкам ўрнашиб олган. Иккинчи вариант эҳтимоли кўпроқ, демоқда расмийлар
Украина қандай қуроллар билан таъминланади
Айни вазиятда Россиянинг урушни чўзишига йўл қўймаслик учун АҚШ Мудофаа вазири Киев иттифоқчиларини Украинага қурол етказиб беришни тезлаштиришга чақирди.
Хусусан, Швеция Украинага 10 та Леопард танки, Норвегия эса АҚШ билан биргаликда Киевга иккита NASAMS зенит ракеталари тизимини топширади.
Ҳозирга келиб бу борада Россия Эрон ва Шимолий Кореяга таянишга мажбур бўлмоқда, чунки рус армиясининг ўзи Иккинчи жаҳон уруши қуролларидан фойдаланишига тўғри келяпти.
Россия эса Эрон ва Шимолий Кореядан қуроллар етказиб берилиши ҳақидаги хабарларни тан олмайди.
Эронда қизлар заҳарланмоқда. Ҳодиса айбдорлари ким?
Эронда мамлакат бўйлаб ўқувчи қизларнинг заҳарланиши март ойида янада кучайди. Эрон ҳукумати бу ҳодисаларга алоқадор 110 кишини ҳибсга олган. Ҳозирда бу ҳаракатлар "қизларнинг мактабга боришига тўсқинлик" деб тахмин қилинмоқда.
Дастлабки заҳарланиш ҳолатлари 2022 йил ноябрда Теҳрон яқинидаги Қум шаҳрида қайд этилган. Ўшанда 18 нафар ўқувчи шифохонага етказилган. Улардан бири оёқларини ҳис қилмаётганини айтган, бошқалари нафас қисилишидан шикоят қилган. Шундан сўнг айрим ота-оналар фарзандларини мактабга юборишдан бош тортган.
Қум воқеаларидан кейин, бир неча ҳафта ичида шундай ҳолатлар, жумладан Теҳрон ва Боружерд шаҳрида қайд этилган, 2023 йил март ойи бошидан заҳарланишлар сони кескин ошди. 6 мартга келиб, мамлакатдаги 31 вилоятнинг 23 тасидан бундай ҳодисалар ҳақида хабарлар келиб тушди.
Аввалроқ Guardian нашри, қизлар кузда ҳукуматга қарши бўлиб ўтган намойишларда қатнашгани учун заҳарланганини ёзди
Эрон президенти Иброҳим Раисий эса юзлаб ўқувчи қизларнинг заҳарланишида Теҳрон душманларини айбламоқда
Ўзбекистонда Наврўз байрами, уйга қандай кетамиз?
Ўзбекистон аҳолиси Наврўз байрамида кетма-кет беш кун: 18, 19, 20, 21, 22 март кунлари дам олади. Маълумки Марказий Осиё давлатлари аҳолиси ушбу байрамни бирдек нишонлайди.
Маълумотларга кўра, қўшниларимиздан қозоғистонликлар Наврўзда икки кун дам олади. Тожикистонда эса Наврўз арафаси аҳоли кетма-кет 8 кун дам олади.
Демак, Наврўз байрами арафасида 5 кун дам оламиз ва албатта олдимизда турган энг муҳим муаммолардан бири уйга қайтиш учун поездга чиптанинг тугаб қолиши.
Муаммога ечим сифатида “Ўзбекистон темир йўллари” матбуот хизмати вилоятларга қўшимча поездлар қатнови йўлга қўйилишини хабар қилди.
Унинг батафсил маълумотлари:
- 17 мартдан 22 мартга қадар Самарқанд—Тошкент—Самарқанд йўналишида юқори тезликда ҳаракатланувчи 767/768-сонли “Афросиёб” электропоезди;
- 20-, 21 март кунлари Тошкент—Қарши—Тошкент йўналишида юқори тезликда ҳаракатланувчи 780/779-сонли “Афросиёб” электропоезди;
- 19-, 21 март кунлари Тошкент—Урганч—Тошкент йўналишида ҳаракатланувчи 156ф/155ф-сонли йўловчи поездлар қатнови йўлга қўйилди.
Изоҳ (0)