Bugun, 13-mart kuni Qonunchilik palatasi qarorining konstitutsiyaga muvofiqligini aniqlash bo‘yicha Konstitutsiyaviy sud majlisi o‘tkazildi. Majlisda so‘z olgan senator Narimon Umarov konstitutsiya O‘zbekiston tarixida ilk marta bevosita xalq xohish-irodasiga muvofiq qabul qilinayotganini aytdi.
Foto: “Daryo”
Narimon Umarovning taʼkidlashicha, yangilanayotgan konstitutsiyaga xalq ovoz bergach, qo‘shimcha hujjatlar qabul qilinishi shart bo‘lmaydi.
“Tariximizda ilk marotaba konstitutsiyaning qabul qilinishi bevosita xalqimizning xohish-irodasiga bog‘liq bo‘ladi. Xalq ovoz bergandan keyin qo‘shimcha hujjatlar qabul qilinishi shart emas. Parlamentda muhokama o‘tkazish va prezident tomonidan imzolanish zaruriyati ham yo‘q. Konstitutsiyaning aksariyat normalari konseptual jihatdan yangilanmoqda. Jumladan, davlat hokimiyati tashkil etish, qonun chiquruvchi va ijro etuvchi hokimiyat tarmoqlarining maqomi, o‘zaro munosabatlar takomillashgani, davlat hokimiyati oliy organlari o‘rtasida balans sezilarli o‘zgarayotgani, shu jumladan, parlament foydasiga ko‘proq o‘zgarayotganini taʼkidlash lozim”, – dedi senator.
Majlisda Konstitutsiyaviy sud raisi o‘rinbosari Asqar G‘ofurov konstitutsiyaga kiritilayotgan o‘zgartirish va qo‘shimchalar natijasida mavjud 128 ta modda 155 taga ko‘payayotganini aytdi.
“Shundan 91 ta moddaga konseptual o‘zgartirishlar kiritilayotgani inobatga olinib, Konstitutsiyaviy sud konstitutsiyani yangi tahrirda bayon etishni asosli deb topadi”, — dedi u.
Asqar G‘ofurov Konstitutsiyaviy sud Konstitutsiyaviy qonun loyihasi va referendum o‘tkazish tartibini ko‘rib chiqayotganda nimalarga eʼtibor qaratishini ham aytib o‘tdi.
“Bunda, avvalo, tegishli normativ hujjatning normalari mazmuni, shakli, davlat organlari va mansabdor shaxslar o‘rtasida vakolatlar chegaralanishi o‘rganiladi. Normativ hujjatning qabul qilinishi, imzolanishi, rasman eʼlon qilinishi tartibi bo‘yicha uning konstitutsiyaga muvofiqligi aniqlanadi. Mazkur qonun talablaridan kelib chiqib, qonun loyihasi qabul qilish tartibiga rioya etilgani masalasi, Qonunchilik palatasi referendum tayinlash tartibiga amal qilgani va referendumga qo‘yilayotgan qonun loyihasida referendum predmeti mavjud yoki mavjud emasligi tekshiriladi”, — dedi rais o‘rinbosari.
Majlisda Konstitutsiyaviy sud Konstitutsiyaviy qonun loyihasini referendumga qo‘yishga monelik qiluvchi holatlar aniqlanmaganini maʼlum qildi.
“Konstitutsiyaning yangi tahrirdagi loyihasi amaldagi konstitutsiya, boshqa hamma qonunlar va O‘zbekistonning xalqaro hujjatlariga to‘liq mos keladi”, — dedi Konstitutsiyaviy sud raisi Mirzo-Ulug‘bek Abdusalomov.
Yig‘ilishda taʼkidlanishicha, konstitutsiyani yangilashga oid qonunni prezident imzolashi ko‘zda tutilmagan. Hujjatni Senat maʼqullashi kerak bo‘ladi. Konstitutsiyaviy o‘zgarishlar referendum natijalari eʼlon qilingan kundan eʼtiboran kuchga kiradi.
“O‘zbekiston Respublikasi konstitutsiyasi to‘g‘risida”gi konstitutsion qonun loyihasi Oliy Majlis Senatining referendumni o‘tkazish to‘g‘risidagi tegishli qarori qabul qilingan kundan eʼtiboran kechi bilan uch kun ichida matbuotda va boshqa ommaviy axborot vositalarida eʼlon qilinishi belgilangan.
Izoh (0)