Sirdaryo viloyatida uyga o‘g‘rilikka tushgan shaxs 14 yoshli qizni pichoqlab o‘ldirgani to‘g‘risida xabar berilgandi. Viloyat sudining jinoyat ishlari bo‘yicha sudlov hay’ati apellyatsiyasi instansiyasida sudlanuvchining shikoyati ko‘rib chiqilib, unga belgilangan jazo o‘zgarishsiz qoldirildi.
Sirdaryo viloyat sudining jinoyat ishlari bo‘yicha sudlov hay’ati apellyatsiyasi instansiyasida Namangan viloyati To‘raqo‘rg‘on tumanida tug‘ilgan, bosqinchilik jinoyatini sodir etgani uchun jazosini o‘tayotgan sudlanuvchining apellyatsiya shikoyati ko‘rib chiqildi.
Muqaddam 11 marotaba o‘g‘rilik va boshqa jinoyatlar bilan sudlangan 26 yoshli mahkum manzil-koloniyadaligida qotillik sodir etgan — u Xovos tumanidagi uylarning biriga o‘g‘irlikka tushganida o‘zini ko‘rib qolgan 14 yoshli qizni o‘ldirgan.
Mahkum 2022-yil 20-avgust kuni soat 04:00 larda noma’lum shaxs Xovos tumani Minor ko‘chasidagi uylarning biriga yashirincha kirib, uyning barcha xonalaridan pul va qimmatbaho buyumlarni izlash jarayonida yotoqxonada yotgan 14 yoshli qiz yuzini ko‘rib qolgani sababli pichoq bilan qasddan o‘ldirgan.
So‘ng pullarni qidirishni davom ettirib, uyning boshqa xonasida namoz o‘qish uchun tayyorgarlik ko‘rayotgan 78 yoshli ayolga pichoq bilan tahdid qilib pullar qayerda ekanini talab qilgan. Biroq ayoldan “pullar yo‘q” degan javobni olgach, xonaning tom qismidan boshqa hovliga kirib, velosipedni o‘g‘irlab qochgan.
Gumonlanuvchi va u bilan birga kelgan kirakash sherigi protsessual tartibda qamoqqa olingan. “Zamon” informatsion dasturida ma’lum qilinishicha, ikki jinoyatchi ortidan 2022-yil noyabr oyida manzil-koloniyaning tarbiyaviy ishlar bo‘limi turkum boshlig‘i lavozimida ishlagan 37 yoshli xodim ham bosqinchini nazoratsiz qoldirgani, odam o‘lishiga sababchi bo‘lgani uchun qamoqqa olingan.
Sirdaryo viloyati sudining jinoyat ishlari bo‘yicha sudlov hay’ati apellyatsiyasi instansiyasida sudlanuvchining shikoyati qanoatlantirilmadi. U Jinoyat kodeksining tegishli moddalarida ko‘rsatilgan jinoyatlarni sodir etganlikda aybli deb topilib, 23 yil muddatga ozodlikdan mahrum etildi. Shuningdek, Jinoyat kodeksining 34-moddasiga (Retsidiv jinoyat) asosan sudlanuvchi “o‘ta xavfli retsidivist” deb topilib, maxsus tartibli koloniyalarda jazoni o‘tashi belgilangan. Sherigi esa 13 yilga ozodlikdan mahrum etildi.
Izoh (0)