“Тарихда илк бор конституция қабул қилиниши бевосита халқимизнинг хоҳиш-иродасига боғлиқ бўлади” — сенатор Наримон Умаров

Бугун, 13 март куни Қонунчилик палатаси қарорининг конституцияга мувофиқлигини аниқлаш бўйича Конституциявий суд мажлиси ўтказилди. Мажлисда сўз олган сенатор Наримон Умаров конституция Ўзбекистон тарихида илк марта бевосита халқ хоҳиш-иродасига мувофиқ қабул қилинаётганини айтди.

Наримон Умаровнинг таъкидлашича, янгиланаётган конституцияга халқ овоз бергач, қўшимча ҳужжатлар қабул қилиниши шарт бўлмайди.

“Тарихимизда илк маротаба конституциянинг қабул қилиниши бевосита халқимизнинг хоҳиш-иродасига боғлиқ бўлади. Халқ овоз бергандан кейин қўшимча ҳужжатлар қабул қилиниши шарт эмас. Парламентда муҳокама ўтказиш ва президент томонидан имзоланиш зарурияти ҳам йўқ. Конституциянинг аксарият нормалари консептуал жиҳатдан янгиланмоқда. Жумладан, давлат ҳокимияти ташкил этиш, қонун чиқурувчи ва ижро этувчи ҳокимият тармоқларининг мақоми, ўзаро муносабатлар такомиллашгани, давлат ҳокимияти олий органлари ўртасида баланс сезиларли ўзгараётгани, шу жумладан, парламент фойдасига кўпроқ ўзгараётганини таъкидлаш лозим”, – деди сенатор.

Мажлисда Конституциявий суд раиси ўринбосари Асқар Ғофуров конституцияга киритилаётган ўзгартириш ва қўшимчалар натижасида мавжуд 128 та модда 155 тага кўпаяётганини айтди.

“Шундан 91 та моддага консептуал ўзгартиришлар киритилаётгани инобатга олиниб, Конституциявий суд конституцияни янги таҳрирда баён этишни асосли деб топади”, — деди у.

Асқар Ғофуров Конституциявий суд Конституциявий қонун лойиҳаси ва референдум ўтказиш тартибини кўриб чиқаётганда нималарга эътибор қаратишини ҳам айтиб ўтди.

“Бунда, аввало, тегишли норматив ҳужжатнинг нормалари мазмуни, шакли, давлат органлари ва мансабдор шахслар ўртасида ваколатлар чегараланиши ўрганилади. Норматив ҳужжатнинг қабул қилиниши, имзоланиши, расман эълон қилиниши тартиби бўйича унинг конституцияга мувофиқлиги аниқланади. Мазкур қонун талабларидан келиб чиқиб, қонун лойиҳаси қабул қилиш тартибига риоя этилгани масаласи, Қонунчилик палатаси референдум тайинлаш тартибига амал қилгани ва референдумга қўйилаётган қонун лойиҳасида референдум предмети мавжуд ёки мавжуд эмаслиги текширилади”, — деди раис ўринбосари.

Мажлисда Конституциявий суд Конституциявий қонун лойиҳасини референдумга қўйишга монелик қилувчи ҳолатлар аниқланмаганини маълум қилди.

“Конституциянинг янги таҳрирдаги лойиҳаси амалдаги конституция, бошқа ҳамма қонунлар ва Ўзбекистоннинг халқаро ҳужжатларига тўлиқ мос келади”, — деди Конституциявий суд раиси Мирзо-Улуғбек Абдусаломов.

Йиғилишда таъкидланишича, конституцияни янгилашга оид қонунни президент имзолаши кўзда тутилмаган. Ҳужжатни Сенат маъқуллаши керак бўлади. Конституциявий ўзгаришлар референдум натижалари эълон қилинган кундан эътиборан кучга киради.

“Ўзбекистон Республикаси конституцияси тўғрисида”ги конституцион қонун лойиҳаси Олий Мажлис Сенатининг референдумни ўтказиш тўғрисидаги тегишли қарори қабул қилинган кундан эътиборан кечи билан уч кун ичида матбуотда ва бошқа оммавий ахборот воситаларида эълон қилиниши белгиланган.