“Грузия орзуси” партияси ҳукумат тепасида экан, Грузия ҳудудида иккинчи фронт очилишига йўл қўйилмайди, деди мамлакат бош вазири Ираклий Гарибашвили.
![](/static/2023/01/Surayyo M/photo_424246.jpeg)
Грузияда ҳокимият алмашинуви ва иккинчи фронт очилиши ҳақидаги гап-сўзлар Тбилиси марказидаги норозилик намойишларидан кейин яна авж олди. Намойишда минглаб одамлар “хорижий агентлар” ҳақидаги қонуннинг қабул қилинишига қарши чиққанди. Натижада ҳукмрон партия уни парламентдан қайтариб олди.
“Сўнгги кунларда биз иккинчи фронт очилиши ва мамлакатдаги беқарорликни қўллаб-қувватлаётган одамлар ҳақида тўлиқ тасаввурга эга бўлдик. Бу ерда 300 дан ортиқ нодавлат нотижорат ташкилотлар ва, албатта, ‘Ягона миллий ҳаракат’ бирлашган. ‘Ягона миллий ҳаракат’нинг асосий мақсади — Грузияни урушга тортиш”, — деди Гарибашвили “Имеди” телеканалида.
“Украинадан кўплаб одамлар келганидан хабарим бор. Уларга мурожаат қилмоқчиман: бу ерда бирор нима бўлади, деган хаёлларга борманг. Ҳеч нарса бўлмайди, биродарлар. Мен Украинадаги барча жангчилар ўз ватанларига, оилаларига соғ-саломат қайтишини тилайман, лекин сизни провокацияларга берилмасликка ва иғвогарлик қилмасликка чақираман”, — дея Гарибашвилининг сўзларини келтиради “Имеди”.
Гарибашвилининг сўзларига кўра, Грузия контекстидаги “иккинчи фронт” тушунчасининг ўзи биринчи марта украиналик сиёсатчилар, хусусан, Украина Миллий хавфсизлик ва мудофаа кенгаши котиби Алексей Данилов томонидан тилга олинган.
Бундан ташқари, Гарибашвили собиқ ички ишлар вазири Вано Мерабишвили бузғунчи “Ягона миллий ҳаракат” партияси Грузияда ҳукуматни ағдариб, иккинчи фронт очмоқчи эканини аллақачон тан олганини айтди. Шу билан бирга, бош вазирнинг таъкидлашича, “радикал мухолифат бунга сайловлар орқали эришиб бўлмаслигини яхши билади”.
Изоҳ (0)