Abxaziya bosh vaziri Gruziyada Rossiyaga qarshi “ikkinchi front” ochishga urinishlar bo‘layotganini aytdi

Abxaziya bosh vaziri Aleksandr Ankvabning aytishicha, Polshadan kelgan emissarlar (davlat yoki siyosiy tashkilotlar tomonidan turli topshiriqlarni bajarish uchun boshqa mamlakatga yuborilgan maxsus vakillar) Gruziyada Rossiyaga qarshi “ikkinchi front” ochishga urinmoqda.

U Abxaziya rahbariyati vaziyatni kuzatib borayotganini ta’kidladi.

“Biz har qanday vaziyatda, ayniqsa, bugungi kunda hushyorlikni yo‘qotmaymiz. Yevropaning turli davlatlaridan, xususan, Polshadan emissarlar kelib, ikkinchi frontni ochishga ilhomlantirayotgani haqida juda ko‘p ma’lumotlar paydo bo‘layotgan bir paytda biz sergakmiz”, — dedi vazir OAVda paydo bo‘lgan ma’lumotlarga izoh berib.

Ankvab mintaqadagi vaziyat har doim tarangligicha qolayotganini ta’kidladi, ammo Gruziyada keskinlashuvga yo‘l qo‘ymaydigan “aqlli odamlar” yetarli ekaniga ishonch bildirdi.

Rossiyaning Ukrainaga bosqini fonida bir qator ukrainalik siyosatchilar Gruziyaga nisbatan turli bayonotlar bergandi. Jumladan Oliy Rada deputati Fyodor Venislavskiy gruzinlar hokimiyatni “aniq qadamlar tashlashga, Abxaziya va Janubiy Osetiyani ozod qilishga” majburlash uchun kamdan-kam uchraydigan imkoniyatga ega ekanini ta’kidlagan.

Rossiya Tashqi ishlar vazirligi Kiyev va ayrim G‘arb davlatlarini Gruziyaning Abxaziya va Janubiy Osetiyada “ikkinchi front” ochishiga qaratilgan provokatsion chaqiriqlarda ayblagan.