Ukraina va AQSH o‘rtasida o‘zaro tushunish haqidagi ommaviy bayonotlarga qaramay urushni tugatish bo‘yicha parda ortidagi kelishmovchiliklar kuchaymoqda. Bu haqda Politico xabar berdi.
Ayrim amerikalik siyosatchilar Vashington Kiyevga juda kam qurol berayotgani va u faqat mudofaaga mo‘ljallanganini aytmoqda.
“Bu shunchaki ularga g‘alaba qozonishi uchun emas, balki omon qolishi uchun yetarli darajada yordam berishmi? Men hozirda g‘alaba qozonish siyosatini ko‘rmayapman, agar u yo‘q bo‘lsa, biz nima qilyapmiz?” — deya Vakillar palatasi a’zosi Maykl Makkol siyosatini tanqid qilgan.
Bayden ma’muriyati esa Ukraina qo‘mondonligi Baxmutni tahdidga qaramay, o‘jarlik bilan himoya qilishga qaror qilganidan “g‘azabda”.
“Ma’muriyatning ko‘plab amaldorlari Ukraina Baxmutga shunchalik ko‘p ishchi kuchi va o‘q-dorilar sarflayotgani, bu ularni bahorda yirik qarshi hujum boshlash imkoniyatidan mahrum qilishi mumkinligidan xavotirlana boshladi”, — deyiladi xabarda.
Vashingtonni asabiylashtirgan yana bir omil, yaqinda OAVda “Shimoliy oqim” gaz quvuridagi portlashga “ukrainaparast guruh” mas’ul ekani haqidagi xabarlar sabab bo‘lgan. Bundan tashqari Kiyevning yangi qurol-yarog‘lar jo‘natish bo‘yicha doimiy so‘rovidan Oq uy g‘azabda ekani aytilgan. Jumladan, "Zelenskiy munosib minnatdorlik bildirmagani" qayd etilgan.
AQSH rasmiylarining ta’kidlashicha, AQSH Kiyevga Ukrainani Rossiyaga qarshi urushda cheksiz moliyalashtira olmasligini ochiq-oydin bildirgan. Biroq ba’zi bir kelishmovchiliklar va umumiy fikr birligining yo‘qligi hamkor davlatlar o‘rtasidagi normal munosabatlar ekani ta’kidlanadi.
“Zelenskiy avval ham (Rossiya keng ko‘lamli bostirib kirishidan oldin) AQSH haqida keskin bayonotlar bildirgan, Oq uy esa ochiq va yopiq tarzda kelishmovchilikni muhokama qilgan. Ammo bu AQSHning Ukrainani qo‘llab-quvvatlashiga, tomonlar hamkorligiga putur yetkazmagan”, — dedi Atlantika kengashining Yevrosiyo markazi direktori o‘rinbosari Shelbi Magid.
Shunga qaramay, AQSH va Ukraina o‘rtasidagi munosabatlardagi asosiy ”inqiroz nuqtasi” urush qanday yakunlanishi kerakligi haqidagi qarashdir. Vashington Rossiya Qrimni yo‘qotish bilan kelishib olishiga shubha qilmoqda. Amerikaliklar Ukraina prinsipial jihatdan Qrim va Donbassni ozod qilishga qodirligiga ham shubha bildirgan.
“Hozircha Bayden AQSH urush va tinchlik bo‘yicha barcha qarorlarni Zelenskiy ixtiyoriga topshiradi, degan so‘zida turishda davom etmoqda. Ammo Vashingtonda urush davom etar ekan va yangi prezidentlik saylovlari yaqinlashar ekan, bu qaror qanchalik ishonchli bo‘lishi haqida mish-mishlar tarqaldi”, — deya xulosa qiladi Politico.
Izoh (0)