O‘zbekistonda muomalaga chiqarilgan bank kartalari soni 2022-yilda 27,1 mln donadan 34,2 mln donagacha ko‘paydi. Bu haqda Markaziy bank xabar berdi.
2022-yilda chakana savdo va pullik xizmatlar ko‘rsatish sohasidagi tadbirkorlik subyektlariga o‘rnatilgan hisob-kitob terminallari soni 434 mingdan ortiqni tashkil etdi.
O‘z navbatida, to‘lov terminallari orqali qabul qilingan to‘lovlar summasi 2021-yilga nisbatan 66,5 trln so‘mga o‘sib, hisobot yilida 177,7 trln so‘mga teng bo‘ldi.
Shuningdek, 2023-yilning 1-yanvar holatiga chiqarilgan kobeyjing bank kartalari soni 1,7 mln donadan ortiqni tashkil etdi.
2018-yildan boshlab O‘zbekistonda kobeyjing kartalari chiqariladi. Ular ikkita to‘lov tizimida ishlab, so‘mda yoki boshqa valyutalarda to‘lash imkonini beradi.
Bu bitta kartadan O‘zbekiston ichida ham, xorijda yoki internet-do‘konlarda ham foydalanish imkonini beradi.
Bundan tashqari, mamlakatda bankomat va infokiosklar soni 57 foizga oshib, 2023-yil 1-yanvar holatiga 20,4 mingdan ortiqni tashkil etdi. Jami bankomatlar orqali amalga oshirilgan tranzaksiyalar hajmida Humo bankomatlaridan o‘tkazilgan amaliyotlar ulushi 2021-yildagi 35 foizdan 49 foizgacha oshishi kuzatildi.
Avvalroq nima uchun bank kartasi raqami 16 xonalik sondan iborat bo‘lishi haqida ma’lumot berilgandi.
Izoh (0)