Nima uchun bank kartasi raqami 16 xonalik sondan iborat bo‘ladi?

Markaziy bankning “FinLit” loyihasi nima uchun bank kartasi raqami 16 xonalik sondan iborat bo‘lishi haqida ma’lumot berdi.

Bank kartasi raqami har biri 4 ta raqamdan iborat 4 ta blokka bo‘lingan 16 ta sondan tashkil topgan bo‘ladi. Bank kartasidagi sonning har bir raqami o‘ziga xos ma’noga ega.

Birinchi 6 ta raqam emitentning (bankning) bank identifikatori bo‘lib, ma’lum bir to‘lov tizimi tomonidan o‘ziga tegishli to‘lov kartasi uchun ma’lum bir bankka taqdim etadigan raqam.

Bank indentifikatori orqali karta turini va uning to‘lov tizimini osonlik bilan aniqlash mumkin. Ushbu sonlar har doim bank kartasi qaysi to‘lov tizimiga tegishli ekanligini ko‘rsatadi.

7 dan 15 gacha bo‘lgan sonlar bank kartasining identifikatsiya raqami hisoblanadi. U bank kartasining turi (debit yoki kredit karta), qaysi valyutadaligi, chiqarilgan hudud va boshqa ma’lumotlarni o‘zida saqlaydi.

Oxirgi 16-raqam tekshiruv raqamidir. U orqali muayyan algoritmga ko‘ra karta soni va tasdiqlash raqamining muvofiqligi tekshiriladi, bu esa bank kartasi raqamining to‘g‘riligini aniqlash imkonini beradi.

Mavzuga doir: Virtual kartalar nima va ulardan qanday qilib to‘g‘ri foydalanish mumkin?