Ўзбекистондаги банк карталари сони 34 миллион донадан ошди

Ўзбекистонда муомалага чиқарилган банк карталари сони 2022 йилда 27,1 млн донадан 34,2 млн донагача кўпайди. Бу ҳақда Марказий банк хабар берди.

2022 йилда чакана савдо ва пуллик хизматлар кўрсатиш соҳасидаги тадбиркорлик субъектларига ўрнатилган ҳисоб-китоб терминаллари сони 434 мингдан ортиқни ташкил этди. 

Ўз навбатида, тўлов терминаллари орқали қабул қилинган тўловлар суммаси 2021 йилга нисбатан 66,5 трлн сўмга ўсиб, ҳисобот йилида 177,7 трлн сўмга тенг бўлди. 

Шунингдек, 2023 йилнинг 1 январь ҳолатига чиқарилган кобейжинг банк карталари сони 1,7 млн донадан ортиқни ташкил этди.

2018 йилдан бошлаб Ўзбекистонда кобейжинг карталари чиқарилади. Улар иккита тўлов тизимида ишлаб, сўмда ёки бошқа валюталарда тўлаш имконини беради.

Бу битта картадан Ўзбекистон ичида ҳам, хорижда ёки интернет-дўконларда ҳам фойдаланиш имконини беради.

Бундан ташқари, мамлакатда банкомат ва инфокиосклар сони 57 фоизга ошиб, 2023 йил 1 январь ҳолатига 20,4 мингдан ортиқни ташкил этди. Жами банкоматлар орқали амалга оширилган транзакциялар ҳажмида Humo банкоматларидан ўтказилган амалиётлар улуши 2021 йилдаги 35 фоиздан 49 фоизгача ошиши кузатилди.

Аввалроқ нима учун банк картаси рақами 16 хоналик сондан иборат бўлиши ҳақида маълумот берилганди.