Telegram jamoasi ilovani yangiladi. Ushbu yangilanishda quvvat tejash rejimi, kuchsizroq Android qurilmalari uchun Telegramni optimallash, yanada ko‘proq ijro tezligi variantlari va boshqalar taqdim etildi.
Quvvat tejash rejimi
Telegramdagi chiroyli animatsiyalar va yengil hajmli effektlar istalgan telefonni kuchli qilish uchun optimallangan, lekin endi ularning quvvat muddatini uzaytirish va unumdorlikni oshirish uchun faolsizlantirish mumkin.
-1.jpg)
Endi quvvat tejash rejimini batareya maʼlum foizga yetganida muayyan effektlarni faolsizlantirish imkonini beradigan alohida sozlamalar bilan avtomatik yoqiladigan qilib sozlash mumkin.
iOS foydalanuvchilari ham fondagi yangilanishlarni cheklash uchun quvvatni tejash sozlamalaridan foydalanishi mumkin. Biroq bundan keyin ekranda “Yangilanmoqda…” yozuvi ancha ko‘proq chiqadi.
“Android uchun biz Telegram qanchalik yaxshi ishlashishini ko‘rish maqsadida 200 dan ortiq qurilmani qo‘lda sinadik va barcha foydalanuvchilar eng yaxshi taassurot olishini taʼminlash uchun birlamchi sozlamalarni optimalladik”, — deyiladi Telegram xabarida
Sozlamalar > Quvvat tejash ruknida Quvvat tejash rejimini yoki avtomatik ijro, animatsiyalar va effektlar uchun alohida sozlamalarni yoqish yoki faolsizlantirish mumkin.
Ijro tezligi sozlamalari
Telegram foydalanuvchilari bir necha yildan buyon videolar, podkastlar, ovozli va video xabarlar uchun ijro tezligini o‘zgartirishi mumkin. Endi ilovada 0,2x dan 2,5x gacha istalgan ijro tezligini belgilash mumkin.
Kichik guruhlarda xabarni o‘qish vaqti
Endi kichik jamoalarda hamkorlikni qulaylashtirish uchun 100 tadan kam aʼzoga ega guruhlarda xabarni har bir kishi tomonidan qachon o‘qilganini ko‘rish mumkin bo‘ladi.
Bot tavsiflari uchun tarjima
Bot foydalanuvchilari endi bot tavsiflarini va “Bu bot nimalar qila oladi?” bo‘limlarini bir nechta tilga tarjima qilish orqali botlarini to‘liq tarjima qilishi mumkin.
iOS uchun ilovada yaxshilangan jildlar
iOS foydalanuvchilari bitta bosish bilan jilddagi barcha xabarlarni o‘qilgan deb belgilashi mumkin. Xabarlarni uzatayotganda jildlardan to‘g‘ri chatni tezda topish uchun foydalanish mumkin. Bu yaxshilanishlar keyingi yangilanishlarda Android ilovasi uchun ham taqdim etiladi.
Telegram dasturchilari yangi funksiyalarni joriy qilishni ikki haftaga kechiktirdi va turli platformalar uchun Telegram ilovalaridagi 400 dan ortiq maʼlum xatoliklarni bartaraf qilishga eʼtibor qaratdi.
Telegram jamoasiga istalgan kishi bugs.telegram.org manzili orqali muammolarni xabar berishi va suggestions.telegram.org manzili orqali takliflar bildirishi mumkin. Faqat murojaatlar ingliz tilida bo‘lishi kerak.
Shuningdek, Telegram Premium foydalanuvchilari uchun maxsus emojilarning o‘nta yangi to‘plami ham tayyorlangan.
Izoh (0)