“Paxtakor” klubi sobiq bosh murabbiyi Shota Arveladze va sport olamining qator vakillari Gruziyada yuz berayotgan voqealar yuzasidan o‘z fikrlarini bildirdi.
“Bizning kelajagimiz faqat yevropaliklar bilan birga bo‘lishi mumkin. Mustaqillik e’lon qilinganidan beri biz yaxshimi yomonmi eng yaxshi mamlakat bo‘la oldik, biroq shunday mas’uliyatli vaqtda o‘zimiz uchun muammo yaratmasligimiz kerak.
Tanlovimiz borasida so‘roq belgisini qo‘yishga ruxsat berishmayapti, uni ko‘rib chiqishga ruxsat berishmayapti. Biz hech qanday Yevropaga kirmaymiz, biz uning bir bo‘lagimiz. Deyarli yuz yillar oldin sobiq ittifoq Sandro Ahmetali, Mixail Javaxishvili va boshqa buyuk gruzinlarni agent va josuslikda ayblagandi.
Boshqacha qarash yoki faoliyat tufayli odamni agent sifatida qoralashga hech qanday qonun yoki hukumat haqli emas, biz buni o‘tmishda qoldirganmiz. Bu qonun raqobat, boshqacha qarash va ozodlikni cheklashga qaratilgan”, — deydi Arveladze.
O‘z navbatida qator sportchilar va sportga aloqador muassasalar ham bu borada o‘z munosabatini bildirdi.
Tbilisining “Dinamo” futbol klubi ushbu qonun loyihasiga qarshi ekanini yashirib o‘tirmadi.
Bizning klub Gruziyaning yevropacha yo‘lini qo‘llab-quvvatlaydi. Bu loyihaga bizning yo‘limizdagi xavf sifatida qaraymiz. Bizning futbol xuddi mamlakat kabi rivojlanishga muhtoj va Gruziya aholisining katta qismi bir necha bor ta’kidlaganidek, bunday imkoniyat faqat Yevropa oilasi orqali mavjud. Yevroittifoq mamlakatimizning asosiy maqsadlaridan biri bo‘lishi kerak va bu yo‘lning haqqoniyligi ayrimlar ko‘rib chiqishiga muhtoj emas, — deyiladi bayonotda.
“Napoli” hujumkor yarim himoyachisi Xvicha Kvaratsxeliya ijtimoiy tarmoqda quyidagi sharh qoldirdi: “Gruziyaning kelajagi Yevropada”. Batumining “Dinamo”sida ijara asosida to‘p surayotgan “Bordo” yarim himoyachisi Zuriko Davitashvili ham xuddi shunday fikrda ekanini e’lon qilgan.
“Valensiya” darvozaboni Georgiy Mamardashvili esa Gruziya va Yevroittifoq bayroqlari tasvirlangan suratga quyidagi jumlani yozdi: “Faqat bitta yo‘l bor”.
“Golden Steyt” safida NBA chempionligini qo‘lga kiritgan sobiq basketbolchi Zaza Pachuliya: “Gruziyaning o‘tmishi, buguni va kelajagi Yevropaga qarab intiladi! Tinchlik va ozodlikning muqobil varianti yo‘q”.
UFC jangchisi Roman Dolidze: “Mening ovozim gruzin xaqiniki bilan bir xil”.
Gruziya parlamenti 7-mart kuni birinchi o‘qishdayoq “xorijiy agentlar” to‘g‘risidagi qonun loyihasini qabul qildi. Ushbu qonun loyihasi mamlakatda noroziliklarga sabab bo‘ldi va ovoz berish jarayonida Rustaveli ko‘chasidagi parlament binosi qarshisida bir necha ming odam to‘plangan. Tbilisi politsiyasi ko‘zni yoshlantiruvchi gaz va vodomyotlardan foydalangan holda namoyishchilarni tarqatishga kirishgan. Namoyishchilar politsiya xodimlariga shisha idishlar, “Molotov kokteyli”ni uloqtirgan.
Qonun loyihasiga muvofiq, Gruziyada “xorijiy agentlar” reyestri paydo bo‘ladi va unga 10 foizdan ortiq qismi xorijdan moliyalashtiriladigan barcha notijoriy yuridik shaxslar va OAV kiritiladi.
Izoh (0)