O‘zbekiston U-20 terma jamoasi bosh murabbiyi Ravshan Haydarov yoshlar o‘rtasidagi Osiyo Kubogi 3-turi doirasida Indoneziyaga qarshi kechgan o‘yindagi (0:0) durangdan keyin o‘z fikrlari bilan o‘rtoqlashdi.
O‘yin haqida
O‘yin muhim edi. Guruhdan chiqishni istadik. Minimum vazifa bajarilganidan xursandman. Bahs bizning nazoratimiz ostida o‘tdi. Menimcha, chiroyli va tartibli o‘yin bo‘ldi. Indoneziya termasi yaxshi himoyalandi. Shunday bo‘lsa-da, ularning himoyasini yorib o‘tishga harakat qildik. Yaxshi vaziyatlar ham yaratdik, ammo ularni golga aylantira olmadik.
Maqsad durang bo‘lmagani borasida
Yo‘q, maqsad durang emas edi, rotatsiya qildik. Bu o‘yin uchun mantiqan olib qaraganda zaxirada o‘tirib qolgan futbolchilarga ham imkon berishimiz mumkin edi. Jarohatlar, charchoqdan qo‘rqdik. Barchani almashtirib tashlab, yigitlarni tonusdan chiqarib qo‘ymoqchi emasman. Ikki o‘yinda ko‘p kuch yo‘qotgan futbolchilar biroz dam olib, kuch yig‘ishi kerak edi. Bugun maydonda harakat qilgan futbolchilar ham yomon o‘yin ko‘rsatgani yo‘q.
Avstraliya haqida
Avstraliyani kuzatib boryapmiz. Ular o‘yindan-o‘yinga kuchayib bormoqda. Buni yana tahlil qilamiz. Murabbiylar shtabimizdagi tahlilchilar o‘yinlarni kuzatib bormoqda. O‘yinga munosib taktika va rejani tayyorlaymiz.
Birinchi navbatda navbatda yigitlarning tiklanish jarayoniga ahamiyat beramiz. Pley-off o‘yinlari barchasini hal qiladi, bitta xato kechirilmasligi mumkin. Yigitlarni yaxshi holatga olib kelib, ruhlantirish, menimcha, unchalik muammo bo‘lmasa kerak. Jahon chempionatiga yo‘llanma, biz, siz, barcha uchun kerak. Bu bahsga har taraflama yaxshi tayyorlanib, yutib olishimiz kerak.
Futbolchilar uzoq masofadan zarba yo‘llamayotgani borasida
Yigitlar deyarli barcha o‘yinlarda uzoqdan zarba berishga harakat qilib ko‘rdi. Indoneziya termasi uzoqdan zarba beriladigan nuqtalarni yaxshi berkitdi. Zarbalarsiz gol bo‘lmaydi. Kimgadir kamroq tep, kimgadir ko‘proq demaymiz. Ha, ba’zida yigitlar ichkariga kirib borishni istadi. Balki shoshqaloqlik, balki, sovuqqonlikdir... O‘rtasida. Bir tomonga ko‘proq yonbosish kerak.
O‘zbekiston birinchi bo‘limda besh himoyachi bilan harakat qilgani borasida
Besh himoyachi ko‘proq 3-4-3 taktikasiga o‘xshaydi. Ikki qanot himoyachilari hujumga ko‘proq chiqib turadi. Himoyachilarga shunday vazifa berilgandi. Indoneziyada bosh murabbiy imzosi ko‘rinib turibdi. Raqib tartibli o‘ynadi. Bizda Abbos va Umarali qanot hujumiga yordam berishi kutilgandi. Maqsadimizga deyarli erishdik. Hujumda vaqt o‘tkazdik, himoyaga ish bo‘lgani ham yo‘q. Albatta, raqib zich o‘ynagani uchun paslarni o‘tkazib bera olmadik. Bunday paytda muammolar yuzaga chiqib keladi, — deydi Haydarov.
O‘zbekiston U-20 terma jamoasi A guruhida birinchi o‘rinni qo‘lga kiritdi va chorak finalda B guruhining ikkinchi jamoasi Avstraliya bilan o‘ynaydi. Mazkur o‘yindagi g‘alaba Jahon chempionatiga yo‘llanmasini taqdi etadi.
Izoh (0)