“Пахтакор” клуби собиқ бош мураббийи Шота Арвеладзе ва спорт оламининг қатор вакиллари Грузияда юз бераётган воқеалар юзасидан ўз фикрларини билдирди.
“Бизнинг келажагимиз фақат европаликлар билан бирга бўлиши мумкин. Мустақиллик эълон қилинганидан бери биз яхшими ёмонми энг яхши мамлакат бўла олдик, бироқ шундай масъулиятли вақтда ўзимиз учун муаммо яратмаслигимиз керак.
Танловимиз борасида сўроқ белгисини қўйишга рухсат беришмаяпти, уни кўриб чиқишга рухсат беришмаяпти. Биз ҳеч қандай Европага кирмаймиз, биз унинг бир бўлагимиз. Деярли юз йиллар олдин собиқ иттифоқ Сандро Аҳметали, Михаил Жавахишвили ва бошқа буюк грузинларни агент ва жосусликда айблаганди.
Бошқача қараш ёки фаолият туфайли одамни агент сифатида қоралашга ҳеч қандай қонун ёки ҳукумат ҳақли эмас, биз буни ўтмишда қолдирганмиз. Бу қонун рақобат, бошқача қараш ва озодликни чеклашга қаратилган”, — дейди Арвеладзе.
Ўз навбатида қатор спортчилар ва спортга алоқадор муассасалар ҳам бу борада ўз муносабатини билдирди.
Тбилисининг “Динамо” футбол клуби ушбу қонун лойиҳасига қарши эканини яшириб ўтирмади.
Бизнинг клуб Грузиянинг европача йўлини қўллаб-қувватлайди. Бу лойиҳага бизнинг йўлимиздаги хавф сифатида қараймиз. Бизнинг футбол худди мамлакат каби ривожланишга муҳтож ва Грузия аҳолисининг катта қисми бир неча бор таъкидлаганидек, бундай имконият фақат Европа оиласи орқали мавжуд. Евроиттифоқ мамлакатимизнинг асосий мақсадларидан бири бўлиши керак ва бу йўлнинг ҳаққонийлиги айримлар кўриб чиқишига муҳтож эмас, — дейилади баёнотда.
“Наполи” ҳужумкор ярим ҳимоячиси Хвича Кварацхелия ижтимоий тармоқда қуйидаги шарҳ қолдирди: “Грузиянинг келажаги Европада”. Батумининг “Динамо”сида ижара асосида тўп сураётган “Бордо” ярим ҳимоячиси Зурико Давиташвили ҳам худди шундай фикрда эканини эълон қилган.
“Валенсия” дарвозабони Георгий Мамардашвили эса Грузия ва Евроиттифоқ байроқлари тасвирланган суратга қуйидаги жумлани ёзди: “Фақат битта йўл бор”.
“Голден Стейт” сафида NBA чемпионлигини қўлга киритган собиқ баскетболчи Заза Пачулия: “Грузиянинг ўтмиши, бугуни ва келажаги Европага қараб интилади! Тинчлик ва озодликнинг муқобил варианти йўқ”.
UFC жангчиси Роман Долидзе: “Менинг овозим грузин хақиники билан бир хил”.
Грузия парламенти 7 март куни биринчи ўқишдаёқ “хорижий агентлар” тўғрисидаги қонун лойиҳасини қабул қилди. Ушбу қонун лойиҳаси мамлакатда норозиликларга сабаб бўлди ва овоз бериш жараёнида Руставели кўчасидаги парламент биноси қаршисида бир неча минг одам тўпланган. Тбилиси полицияси кўзни ёшлантирувчи газ ва водомётлардан фойдаланган ҳолда намойишчиларни тарқатишга киришган. Намойишчилар полиция ходимларига шиша идишлар, “Молотов коктейли”ни улоқтирган.
Қонун лойиҳасига мувофиқ, Грузияда “хорижий агентлар” реестри пайдо бўлади ва унга 10 фоиздан ортиқ қисми хориждан молиялаштириладиган барча нотижорий юридик шахслар ва ОАВ киритилади.
Изоҳ (0)