AQSH razvedkasi amerikalik diplomatlar orasida uchrayotgan “Gavana sindromi” kasalligiga boshqa davlatlarning, jumladan OAV xabarlarida aytilganidek Rossiyaning aloqadorligi borasida hech qanday dalil topmadi. Bu haqda Associated Press uzoq davom etgan tekshiruv natijasida tayyorlangan hisobotga tayanib yozmoqda. Hujjat mazmunini jurnalistlarga ismini oshkor qilmaslik sharti bilan ikki amaldor oshkor qildi. Shuningdek, xulosalar haqida ABC telekanali AQSH Milliy razvedkasi rahbari Evril Xeynsga tayanib xabar berdi.
Bir necha yil davomida AQSHning yetti agentligi va razvedka xizmatlari tomonidan keng ko‘lamli tekshiruv o‘tkazildi, uning bir qismi sifatida 96 mamlakatda “Gavana sindromi”ga chalinish bo‘yicha 1500 ga yaqin holat o‘rganildi.
Yigirmaga yaqin ish alohida sinchkovlik bilan baholandi — ularning hech birida Qo‘shma Shtatlarga nisbatan do‘st bo‘lmagan davlatlarning kasallikni qasddan yaratgani haqida dalil topilmadi. Aksincha, deb yozadi AP, tergov “boshqa davlatlar bunga aloqador emasligi haqida dalillar” oldi. Razvedka, shuningdek, “Gavana sindromi” Amerika diplomatik missiyalarida kimningdir beixtiyor, masalan, eshitish qurilmalaridan foydalanishi tufayli yuzaga kelgan bo‘lishi mumkinligi haqidagi versiyani rad etdi.
Tergov mualliflarining xulosasiga ko‘ra, aksariyat holatlar turli sabablarga ko‘ra yuzaga kelmoqda — yashirin kasalliklardan tortib kundalik hayotda ishlatiladigan oddiy qurilmalarning elektromagnit ta’sirigacha.
AQSHning Kubadagi elchixonasi xodimlari ilk bor 2016-yilda “gavana sindromi”ga duchor bo‘lishgandi. O‘shandan beri shunga o‘xshash hodisalar O‘zbekiston, Xitoy, Rossiya va Avstriyadagi diplomatlarda aniqlandi, deb yozadi WSJ. 2021-yilda NATO tarkibiga kiruvchi davlatlardan birida amerikalik diplomatlar birinchi marta “Gavana sindromi”dan shikoyat qilishdi —hodisa Germaniyada sodir bo‘ldi.
2018-yildan beri OAV AQSH razvedka idoralari Rossiyaning “Gavana sindromi”ga aloqadorlikda gumon qilayotgani haqida yozmoqda. Rasmiy Vashington bu borada Moskvani biror marta ayblamagan.
Izoh (0)