Zelenskiy ofisi Putinning Ukraina bo‘yicha “rejalari” haqida ma’lumot berdi
Ukraina prezidenti ofisi rahbari maslahatchisi Mixail Podolyak Rossiya prezidenti Vladimir Putinning urushdagi “rejalari” haqida gapirdi. U Twitter’dagi sahifasida tegishli tvitni joyladi.
Podolyakning so‘zlariga ko‘ra, Putin urushning cho‘zilishi va Ukrainadagi vaziyatning ichki beqarorlashuviga umid qilmoqda. Ukrainalik rasmiy hozirda Kremlning aniq rejasi borligi va u harbiy mojaroni sun’iy ravishda cho‘zish orqali Ukraina harbiylari va tinch aholini “charchatish”dan iboratligini aytdi.
Podolyak Putin Ukrainaning g‘arbdagi ittifoqchilarining iqtisodiy tizimi qulashi va inqiroz davriga kirishini kutayotganini ta’kidladi.
“Rossiya rahbari shu tariqa xorijdan texnika va o‘q-dorilar yetkazib berishga bog‘liq bo‘lgan Ukrainaning mudofaa qobiliyatini susaytirishga umid qilmoqda. Rossiya Ukrainaning taslim bo‘lishiga ichki qarama-qarshiliklarni kuchaytirish orqali erishish mumkinligiga ishonmoqda. Shu maqsadda Rossiya dunyoning turli mamlakatlarida manipulyativ ’urushga qarshi’ harakatlarni tashkil qiladi. Ularda Ukraina kuchlari tomonidan o‘t ochishni to‘xtatish va tinchlik evaziga bosib olingan hududlarni Rossiyaga topshirishdan iborat bo‘lgan shiorlar yangraydi”, — deydi Mixail Podolyak.
