O‘zbekiston U-20 terma jamoasi bosh murabbiyi Ravshan Haydarov Osiyo Kubogi—2023 1-turi doirasida kechgan Suriyaga qarshi o‘yindan (2:0) keyin o‘z fikrlari bilan o‘rtoqlashdi.
O‘yin haqida
O‘yin qiyin kechishini bilar edik. So‘nggi nuqtani qo‘yishda ishlashimiz kerakligi ko‘rinib turibdi. O‘ylaymanki, standart orqali gollar urib, haqli g‘alabaga erishdik.
Hujum chizig‘idagi palapartishliklar borasida
Bosim, hayajon bo‘ladigan narsa. O‘yinchilarimiz o‘yinni bog‘lashda, hujumni yakunlashda qiynalgani ishtiyoq haddan tashqari ko‘pligi bilan bog‘liq. Hujumga nuqta qo‘yishda qiyinchilikka duch keldik, sovuqqonlik yetishmadi. Bu yoshda bunday holatlar uchrab turadi. Himoyadan chiqishda, markazda hammasi me’yorida kechdi. Standartlar esa oldingi chiziqdagi harakatlar mahsuli.
Umarali Rahmonaliyevning hayajoni haqida
Nafaqat Umaralida, hammada hayajon bo‘ldi. Suriya yakkakurashlarda baquvvat jamoa. Bu ko‘rinib turibdi. Umuman olganda yigitlarga rahmat. O‘z saviyasini namoyish etib, chiroyli o‘yin ko‘rsatdi deb o‘ylayman.
Abbos Fayzullayevga o‘rinbosar bor-yo‘qligi haqida
Abbos jismonan tayyor. Oxirida charchab qolgani ko‘rindi. Almashtirish rejamiz bor edi. Hisob ishonchli ko‘rinishga kelgandan keyin, vaqti kelgan paytda almashtirdim. Zaxirada o‘yinni kuchaytiradigan futbolchilar bor, albatta.
Abbos kerak paytda yugurmasdan ham, bexato va kerakli paslarni bera oladi. Baribir birinchi bahsda kirishib ketish qiyin. Shularni hisobga olgan holda o‘yinning oxirigacha ushlab turdim. Ko‘p yugurmasa ham? To‘g‘ri pas berish qobiliyati bor. Bugun ham juda yaxshi o‘yin ko‘rsatdi.
Sariq kartochkalar borasida
Ikkala kartochka ham ishtiyoq balandligi tufayli yuzaga keldi. 2-bo‘limda Suriyani pressing ostida ushlab turishni rejalashtirgandik. Yigitlarga o‘yindan oldin ham, o‘yin davomida ham bunday holatlarga yo‘l qo‘ymaslikni ta’kidladik. Bu o‘yinning bir qismi. Yigitlar ham buni tushunishadi deb o‘ylayman. Muxlislar juda ko‘p edi, yigitlar bunday atmosferada hali o‘yin o‘tkazmagan, shu ham sabab bo‘lishi mumkin.
Muhimi, uch ochkoni qo‘lga kiritdik. Hozirdanoq keyingi turlarga hozirlik ko‘rishni boshlaymiz. Jismoniy holatni to‘g‘rilash ustida ish olib boramiz. Biz uchun har bir o‘yin muhim ahamiyat kasb etadi. Bu g‘alaba bilan hali hech narsa hal bo‘lgani yo‘q, — deydi Haydarov.
Izoh (0)