Futbol bo‘yicha 20 yoshgacha bo‘lgan futbolchilar o‘rtasidagi Osiyo Kubogi—2023 1-turida O‘zbekiston vakillari 1-mart kuni Suriyaga qarshi bahs olib bordi.
Uchrashuv Ravshan Haydarov shogirdlarining folligida boshlandi. Vaqt o‘tib suriyaliklar ham bir necha bor xavfli yurishlar qilishga muvaffaq bo‘ldi. Bo‘limning ikkinchi yarmida ustunlik to‘liq o‘zbekistonlik yoshlar tomonida bo‘ldi.
37-daqiqada Abbosbek Fayzullayev jarima zarbasini qoyilmaqom bajarib, hisobni ochdi. Bo‘lim tugagunga qadar O‘zbekiston vakillarida yana bir nechta golga tortadigan vaziyatlar bo‘ldi, xususan, Nodirbek Abdurazzoqov yaqin masofadan bo‘sh qolgan darvozani aniq nishonga ololmadi.
68-daqiqada hisob 2:0 ko‘rinishini oldi: Fayzullayev to‘pni burchakdan kiritganidan keyin raqib futbolchisi boshi bilan o‘z darvozasini ishg‘ol qilib qo‘ydi. Qolgan vaqtda hisob o‘zgarmadi.
Guruhning narigi o‘yinida Iroq yoshlari Indoneziya ustidan g‘alaba qozongandi (2:0).
Parallel o‘tgan B guruhidagi o‘yinda Eron terma jamoasi minimal hisobda Qatardan ustun keldi.
U-20 Osiyo Kubogi—2023
1-tur bahslari
1-mart, chorshanba
O‘zbekiston U-20 — Suriya U-20 2:0
Gollar: 1:0 – 37 Fayzullayev, 2:0 – 68, avtogol Al-Hejjeh.
O‘zbekiston U-20: 21. Otabek Boymurodov, 3. Abduqodir Husanov, 6. Jahongir O‘rozov, 7. Po‘latxo‘ja Xoldorxonov (23. Asadbek Jo‘raboyev, 90), 8. Behruzbek Asqarov (4. Abubakr Ashurov, 90), 10. Umarali Rahmonaliyev, 13. Zafarmurod Abdurahmatov, 14. Abbosbek Fayzullayev (16. Shahzodbek Rahmatullayev, 82), 15. Diyorbek Ortiqboyev, 17. Nodirbek Abdurazzoqov (19. Shahzod Akramov, 60), 20. Mahmudjon Mahamadjanov.
Suriya U-20: 1. Maksim Sarraf, 3. Xolid al-Hejjeh, 5. Amir Al-Fayod, 6. Malik Janir, 7. Hasan Usmon (21. Muhammad Asad, 87), 8. Mahmud Nayef, 9. Zakariya ar-Ramadon, 10. Mahmud Al-Asvad, 12. Mahmud Manna (11. Elias Safar, 62), 14. Almekdad Ahmad, 15. Muhammad Otman.
Ogohlantirishlar: Abdurazzoqov (31), Al-Hejjeh (83).
Qatar U-20 — Eron U-20 0:1
Gol: 0:1 – 65, penalti Hazbavi.
Izoh (0)