Ўзбекистон U-20 терма жамоаси бош мураббийи Равшан Ҳайдаров Осиё Кубоги—2023 1-тури доирасида кечган Сурияга қарши ўйиндан (2:0) кейин ўз фикрлари билан ўртоқлашди.
Ўйин ҳақида
Ўйин қийин кечишини билар эдик. Сўнгги нуқтани қўйишда ишлашимиз кераклиги кўриниб турибди. Ўйлайманки, стандарт орқали голлар уриб, ҳақли ғалабага эришдик.
Ҳужум чизиғидаги палапартишликлар борасида
Босим, ҳаяжон бўладиган нарса. Ўйинчиларимиз ўйинни боғлашда, ҳужумни якунлашда қийналгани иштиёқ ҳаддан ташқари кўплиги билан боғлиқ. Ҳужумга нуқта қўйишда қийинчиликка дуч келдик, совуққонлик етишмади. Бу ёшда бундай ҳолатлар учраб туради. Ҳимоядан чиқишда, марказда ҳаммаси меъёрида кечди. Standartлар эса олдинги чизиқдаги ҳаракатлар маҳсули.
Умарали Раҳмоналиевнинг ҳаяжони ҳақида
Нафақат Умаралида, ҳаммада ҳаяжон бўлди. Сурия яккакурашларда бақувват жамоа. Бу кўриниб турибди. Умуман олганда йигитларга раҳмат. Ўз савиясини намойиш этиб, чиройли ўйин кўрсатди деб ўйлайман.
Аббос Файзуллаевга ўринбосар бор-йўқлиги ҳақида
Аббос жисмонан тайёр. Охирида чарчаб қолгани кўринди. Алмаштириш режамиз бор эди. Ҳисоб ишончли кўринишга келгандан кейин, вақти келган пайтда алмаштирдим. Захирада ўйинни кучайтирадиган футболчилар бор, албатта.
Аббос керак пайтда югурмасдан ҳам, бехато ва керакли пасларни бера олади. Барибир биринчи баҳсда киришиб кетиш қийин. Шуларни ҳисобга олган ҳолда ўйиннинг охиригача ушлаб турдим. Кўп югурмаса ҳам? Тўғри пас бериш қобилияти бор. Бугун ҳам жуда яхши ўйин кўрсатди.
Сариқ карточкалар борасида
Иккала карточка ҳам иштиёқ баландлиги туфайли юзага келди. 2-бўлимда Сурияни прессинг остида ушлаб туришни режалаштиргандик. Йигитларга ўйиндан олдин ҳам, ўйин давомида ҳам бундай ҳолатларга йўл қўймасликни таъкидладик. Бу ўйиннинг бир қисми. Йигитлар ҳам буни тушунишади деб ўйлайман. Мухлислар жуда кўп эди, йигитлар бундай атмосферада ҳали ўйин ўтказмаган, шу ҳам сабаб бўлиши мумкин.
Муҳими, уч очкони қўлга киритдик. Ҳозирданоқ кейинги турларга ҳозирлик кўришни бошлаймиз. Жисмоний ҳолатни тўғрилаш устида иш олиб борамиз. Биз учун ҳар бир ўйин муҳим аҳамият касб этади. Бу ғалаба билан ҳали ҳеч нарса ҳал бўлгани йўқ, — дейди Ҳайдаров.
Изоҳ (0)