“Ai-80 benzini uchun aksizning yil oxirigacha nollashtirilishi budjetga tushumlarni 4 trln so‘mdan ko‘proqqa kamaytirishi mumkin” – iqtisodchi Otabek Bakirov

O‘zbekistonda Ai-80 benzini uchun aksiz solig‘ini “nol” stavkada qo‘llash muddati 2023-yil oxirigacha uzaytirilgani budjet tushumlarini 4 trillion so‘mdan ko‘proqqa kamaytirishi mumkin. Bu haqda iqtisodchi Otabek Bakirov Telegram'dagi kanalida post qoldirdi.

Respublikada 2022-yil 10-dekabrdan boshlab amal qilayotgan Ai-80 rusumli avtobenzin uchun aksiz solig‘ini “nol” stavkada qo‘llash muddati 2023-yil 1-mart kuni yakuniga yetishi kerak edi.

Prezident Shavkat Mirziyoyev tomonidan 28-fevral kuni imzolangan qarorga muvofiq, Ai-80 rusumli avtobenzin mahsuloti uchun aksiz solig‘ini “nol” stavkada qo‘llash muddati 2023-yil 31-dekabrga qadar uzaytirildi.

Otabek Bakirov fikricha, aksiz solig‘iga cheksiz muddat imtiyoz berish narxlar o‘sishini to‘xtatib qola olmaydi, narxlarni tiyuvchi asosiy omil raqobat muhiti shakllanishidir.

“Budjet parametrlariga ko‘ra, 1-fevraldan 10 foizga indeksatsiyalangani, shuningdek, import, ishlab chiqarishdagi hamda yakuniy isteʼmolchiga sotishdagi asosiy benzin Ai-80 ekani nazarda tutilsa, yil oxirigacha nollashtirish qiymati budjet uchun 4 trillion so‘mdan ko‘proqqa aylanishi mumkin.

2022-yil yakunlari bo‘yicha neft mahsulotlaridan 576,6 milliard so‘m, oxirgi isteʼmolchiga realizatsiya qilishdan 3 387,9 milliard so‘m aksiz solig‘i yig‘ilgan. Albatta, narxlarni barqarorlashtirish uchun bu kerakli favqulodda chora. Lekin raqobatni qo‘llab-quvvatlash, importchilar soni ko‘payishini rag‘batlantirish, notarif va texnik talablarni yumshatish masalalariga ham eʼtibor bo‘lishi zarur.

Alaloqibat ishlab chiqarish, import, ulgurji va chakana savdodagi monopollashgan vaziyatda aksizga cheksiz muddat imtiyoz berish narxlar o‘sishini to‘xtatib qololmaydi, o‘rta va uzoq muddatli istiqbolda narxlarni tiyuvchi bosh omil bu raqobat muhitini shakllantirish bo‘lishi zarur”, – deb yozgan iqtisodchi.

Eslatib o‘tamiz, “O‘zbekneftgaz”ga qarashli barcha AYQSHlarda 13-dekabr soat 00:00 dan boshlab Ai-80 benzini narxi bir litri uchun 5700 so‘mdan sotila boshlangan.

Mavzuga doir: 

O‘zbekistonda sifatsiz benzin sotgan va narxni asossiz oshirgan qator AYQSHlarga benzin xarid qilishga cheklovlar o‘rnatildi

Ai-80 narxlari oshishi kutilmoqda: Toshkentda kunlik benzin narxlari e’lon qilindi