Ukraina prezidenti ofisi maslahatchisi Mixail Podolyak mamlakat armiyasining Rossiyaga qarshi hujum qilish ehtimolini baholadi. Siyosatchi Twitter’dagi sahifasida bu haqda tvit qoldirdi.

Podolyakning ta’kidlashicha, Ukraina mudofaa urushini olib bormoqda va Rossiya hududiga zarba bermaydi. Rossiyada dron hujumlari bilan bog‘liq hodisalar esa rossiyaliklar orasida vahima jarayoni bilan bog‘liq.

“Ukraina Rossiya hududiga zarba bermaydi. Ukraina o‘zining barcha hududlarini qaytarib olish uchun mudofaa urushini olib bormoqda. Rossiyada vahima jarayonlari kuchaymoqda, bu noma’lum dronlarning mamlakat infratuzilma obyektlariga hujumida namoyon bo‘lmoqda”, — dedi siyosatchi.

Avvalroq Ukraina Milliy xavfsizlik va mudofaa kengashi kotibi Aleksey Danilov urushning tugash shartini aytgandi. U Ukraina tanklari Moskvadagi Qizil maydonda bo‘lganida urush tugashi va bu adolatli yechim bo‘lishini ta’kidlagan. Danilov Kreml Ukrainani Shimoliy va Janubiy Koreya kabi parchalab, Rossiyaga g‘alaba illyuziyasini taqdim etish niyatidaligini qo‘shimcha qilgan.

1-mart kuni Rossiya Mudofaa vazirligi Ukraina dronlarining Qrim yarim oroli obyektlariga ommaviy hujumi oldi olingani haqida xabar berdi. Hodisa oqibatida hech kim jabrlanmagani qayd etildi. Ukraina mazkur ma’lumotga hali munosabat bermadi.