Bolgariya, Xorvatiya, Chexiya, Finlyandiya, Fransiya, Vengriya, Niderlandiya, Polsha, Ruminiya, Slovakiya va Sloveniya mavjud atom stansiyalari bilan bir qatorda “yangi loyihalarni qo‘llab-quvvatlashga” kelishib oldi. Bu haqda Stokgolmdagi Yevropa Ittifoqi energetika vazirlari yig‘ilishida e’lon qilingan bayonotda xabar qilindi.
Ta’kidlanishicha, atom energetikasi iqlim bo‘yicha maqsadlarga erishish, iste’molchilar talabini qondirish va “ta’minot xavfsizligi maqsadida” elektr energiyasi ishlab chiqarish uchun ko‘plab vositalardan biridir.
11 mamlakat vazirlari atom energetikasi bo‘yicha ilmiy hamkorlikni yanada rivojlantirish va xavfsizlik masalalarini hal etishda tajriba almashish imkoniyatlarini ko‘rib chiqqan.
Misol uchun, uzoq vaqtdan beri atom energiyasiga tayanib kelgan Fransiya Yevropa atom energetikasi bo‘yicha yaqinroq aloqalarni o‘rnatishga harakat qilmoqda. Fransiyaning maqsadi “Yadroviy ittifoq yaratish” hisoblanadi.
Parijga ko‘ra, atom energetikasi mamlakat va Yevropaga iqlim maqsadlariga erishishda, ayniqsa transport va sanoat uchun “yashil” vodorod ishlab chiqarishda yordam berishi mumkin.
Ammo bu masala Yevropani ikkiga bo‘lib yubordi va Yevropa Ittifoqining bir qancha davlatlari keskin qarshilik ko‘rsatmoqda. Tanqidlar asosan Germaniya va Ispaniya tomonidan bo‘lmoqda.
Bundan tashqari Avstriya, Germaniya va Lyuksemburg Stokgolmda Yevropada atom energetikasini rivojlantirishga qarshi ekanliklarini yana bir bor tasdiqladi.
Dushanba kuni Lyuksemburg energetika vaziri Klod Turmes yangi atom stansiyalarini qurish uchun 15 yil vaqt ketishini qo‘shimcha qilib, “Agar iqlim o‘zgarishiga qarshi kurashda g‘alaba qozonishni istasak, tezkor bo‘lishimiz kerak”, degan edi.
Hozirda Yevropa Ittifoqi elektr energiyasi bozorini isloh qilish masalasini muhokama qilmoqda. Blok bu borada ham kelisha olmayapti.
Fransiya yadroviy ishlab chiqarishga foyda keltiradigan kafolatlangan narxlarda uzoq muddatli energiya shartnomalarini tavsiya qilayotgan bo‘lsa, Germaniya bunday harakatga keskin qarshi.
Izoh (0)