“Soliq” ilovasida ro‘yxatdan o‘tkazilgan cheklar uchun keshbek olishda Face ID bo‘yicha identifikatsiya qilish talabi joriy etildi. Bu haqda Soliq qo‘mitasining matbuot xizmati xabar bermoqda.
Bu jarayon ilovadagi shaxsiy hisob orqali Face ID bo‘limida amalga oshiriladi. Bunda shaxsiy identifikatsiya raqamini (JShShIR) kiritish, keyin yuzni to‘liq suratga olish va uni tasdiqlash uchun yuborish kerak.
Shu paytga qadar 500 ming so‘mdan ortiq mablag‘ni hisobga o‘tkazish uchun faqat fotosurat yordamida shaxsni tasdiqlash talab qilinardi. Endi bu shart har qanday bonus miqdori uchun amal qiladi.
Ma’lumot uchun, yanvar oyida cheklari eng ko‘p ro‘yxatdan o‘tkazilgan kompaniyalar orasida Korzinka yetakchilik qilmoqda — 2,6 million dona chek. Korzinka’dan sotib olingan mahsulotlarga 3,7 mlrd so‘m keshbek berilgan.
Ikkinchi o‘rinda Havas cheklari (1,3 million dona, keshbek summasi 703,1 mln so‘m) qayd etilgan bo‘lsa, UNG Petro cheklari (594,5 ming ta chek, keshbek summasi 2,7 mlrd so‘m) uchinchi bo‘lgan.
Izoh (0)