Болгария, Хорватия, Чехия, Финляндия, Франция, Венгрия, Нидерландия, Польша, Руминия, Словакия ва Словения мавжуд атом станциялари билан бир қаторда “янги лойиҳаларни қўллаб-қувватлашга” келишиб олди. Бу ҳақда Стокгольмдаги Европа Иттифоқи энергетика вазирлари йиғилишида эълон қилинган баёнотда хабар қилинди.
Таъкидланишича, атом энергетикаси иқлим бўйича мақсадларга эришиш, истеъмолчилар талабини қондириш ва “таъминот хавфсизлиги мақсадида” электр энергияси ишлаб чиқариш учун кўплаб воситалардан биридир.
11 мамлакат вазирлари атом энергетикаси бўйича илмий ҳамкорликни янада ривожлантириш ва хавфсизлик масалаларини ҳал этишда тажриба алмашиш имкониятларини кўриб чиққан.
Мисол учун, узоқ вақтдан бери атом энергиясига таяниб келган Франция Европа атом энергетикаси бўйича яқинроқ алоқаларни ўрнатишга ҳаракат қилмоқда. Франциянинг мақсади “Ядровий иттифоқ яратиш” ҳисобланади.
Парижга кўра, атом энергетикаси мамлакат ва Европага иқлим мақсадларига эришишда, айниқса транспорт ва саноат учун “яшил” водород ишлаб чиқаришда ёрдам бериши мумкин.
Аммо бу масала Европани иккига бўлиб юборди ва Европа Иттифоқининг бир қанча давлатлари кескин қаршилик кўрсатмоқда. Танқидлар асосан Германия ва Испания томонидан бўлмоқда.
Бундан ташқари Австрия, Германия ва Люксембург Стокгольмда Европада атом энергетикасини ривожлантиришга қарши эканликларини яна бир бор тасдиқлади.
Душанба куни Люксембург энергетика вазири Клод Турмес янги атом станцияларини қуриш учун 15 йил вақт кетишини қўшимча қилиб, “Агар иқлим ўзгаришига қарши курашда ғалаба қозонишни истасак, тезкор бўлишимиз керак”, деган эди.
Ҳозирда Европа Иттифоқи электр энергияси бозорини ислоҳ қилиш масаласини муҳокама қилмоқда. Блок бу борада ҳам келиша олмаяпти.
Франция ядровий ишлаб чиқаришга фойда келтирадиган кафолатланган нархларда узоқ муддатли энергия шартномаларини тавсия қилаётган бўлса, Германия бундай ҳаракатга кескин қарши.
Изоҳ (0)