Toshkent shahrining ikki tumanida taʼmirlash ishlari sababli gaz taʼminoti vaqtincha to‘xtatiladi. Bu haqda “Hududgaz Poytaxt” gaz taʼminoti filiali matbuot xizmati xabar berdi.
Xabarga ko‘ra, Mirzo Ulug‘bek tumani Qorasuv-1 dahasi hududidan o‘tgan yerusti d-76mmli, past bosim gaz quvuriga daraxt sinib tushishi natijasida gaz quvuri egilib qolgani tufayli to‘g‘rilash ishlari rejalashtirilgan. Shu sababli 1-mart kuni soat 10:00 dan 18:00 ga qadar tumandagi Qorasuv-1 dahasidagi 40 ta ko‘p qavatli uydagi jami 2400 ta aholi xonadonida tabiiy gaz taʼminoti vaqtinchalik to‘xtatiladi.
Shuningdek, Yashnobod tumani “Muxtor Ashrafiy” MFY, Muxtor Ashrafiy ko‘chasidagi d-76mmli, o‘rta bosim gaz quvuri zulfinini taʼmirlash hamda gaz xavfsiz joyga ko‘chirish ishlari rejalashtirilgan. Shu sababli joriy yilning 1-mart kuni soat 10:00 dan 17:00 ga qadar tumandagi “Muxtor Ashrafiy” MFYdagi 70 ta uy xo‘jaligida tabiiy gaz taʼminoti vaqtinchalik to‘xtatiladi.
Taʼmirlash ishlari yakunlangach tabiiy gaz taʼminoti qayta tiklanadi. Yetkazilayotgan noqulayliklar uchun “Hududgaz Poytaxt” gaz taʼminoti filiali isteʼmolchilardan uzr so‘ragan.
Izoh (0)