Toshkent shahri Chilonzor tumanidagi 181-maktabning 9-sinf o‘quvchilari suvenir dollarni sochib, raqsga tushgani aks etgan video ijtimoiy tarmoqlarda tarqaldi. Poytaxt Xalq ta’limi bosh boshqarmasi holat yuzasidan munosabat bildirdi.
Ishchi guruh tomonidan o‘tkazilgan o‘rganishga ko‘ra, maktabning to‘rt nafar o‘quvchisi — M.M., X.M., D.M. va I.M. darsdan keyin sinfxonada xorijning suvenir pullarini sochib, videolavha tasvirida ishtirok etgan. Ularning sinfdoshi I.S. esa holatni videotasvirga olib, TikTok sahifasiga yuklagan.
28-fevral kuni mazkur ta’lim muassasasida o‘quvchilar va ularning ota-onalar ishtirokida profilaktik suhbat o‘tkazilgan. Unda tuman xalq ta’limi bo‘limi vakillari, mahalla faollari, Yoshlar ishlari agentligi tuman bo‘limi rahbari B. Ziyoviddinov, ichki ishlar organi XPB inspektori, psixolog-mayor S.Nuriddinov qatnashgan. Yig‘ilishda o‘quvchi-qizlarning yuqoridagi xatti-harakati odob-axloq qoidalariga zid ekani, milliy urf-odatlarga to‘g‘ri kelmasligi yana bir bor tushuntirib o‘tilgan.
Shuningdek, maktab direktori M.Saburova so‘zga chiqib, Xalq ta’limi vazirligining “Odob-axloq va ichki tartib qoidalari to‘g‘risida”gi buyrug‘i haqida tushuntirib o‘tgan va o‘quvchilarni bunday holatni boshqa takrorlanmasligi bo‘yicha ogohlantirgan. ”Maqtanchoq o‘quvchi qizlar” videolavhasida qatnashgan 9-“B” sinf o‘quvchisi M.M.ning onasi M.N. so‘z olib, o‘quvchi-qizlarning chuqur mohiyatini anglamasdan video tarqatganliklari uchun ota-onalar nomidan maktab ma’muriyatidan uzr so‘ragan.
Izoh (0)