Ўзбекистон давлат назорати органлари ўртасида юқори хавф туғдирадиган маҳсулот ҳақида тезкор равишда ўзаро хабар бериш тизими яратилади ва фаолият кўрсатади. Бу ҳақда “Техник жиҳатдан тартибга солиш тўғрисида”ги қонунда белгиланди.
Адлия вазирлиги хабарига кўра, 27 февраль куни президент томонидан имзоланган қонунга кўра, техник жиҳатдан тартибга солиш — маҳсулотнинг хавфсизлигига, уни ишлаб чиқариш жараёнларига ва усулларига доир талабларни белгилаш, қўллаш ҳамда бажариш, шунингдек, уларга риоя этилишини мувофиқликни баҳолаш ва давлат назоратини амалга ошириш орқали текширишдир.
Ўзбекистон техник жиҳатдан тартибга солиш агентлиги техник жиҳатдан тартибга солиш соҳасидаги махсус ваколатли давлат органи ҳисобланади. Вазирлар Маҳкамаси мазкур соҳадаги ваколатли давлат бошқаруви органларини белгилайди ва улар фаолиятини мувофиқлаштиради.
Қонунга мувофиқ, техник регламентлар қуйидаги мақсадларда қабул қилинади:
- маҳсулот хавфсизлиги талабларини белгилаш орқали фуқароларнинг ҳаётини ёки соғлиғини муҳофаза қилиш;
- атроф-муҳитни, ҳайвонот ва ўсимлик дунёсини муҳофаза қилиш;
- харидорларни (истеъмолчиларни) чалғитадиган ҳаракатларнинг олдини олиш;
- энергия жиҳатдан самарадорликни ва табиий ресурслардан оқилона фойдаланишни таъминлаш;
- савдодаги техник тўсиқларни бартараф этиш;
- ички ва ташқи бозорларда маҳсулотнинг рақобатбардошлилигини ошириш.
Техник регламентларда белгиланган мувофиқликни мажбурий равишда тасдиқлаш қуйидаги шаклларда амалга оширилади:
- мувофиқликни декларация қилиш;
- мажбурий сертификатлаштириш.
Қонун расмий эълон қилинган кундан эътиборан 6 ой ўтгач кучга киради.
“Техник жиҳатдан тартибга солиш тўғрисида”ги қонуннинг аввалги таҳрири 2009 йилнинг 24 апрелидан буён амалда бўлиб келаётганди.
2021 йил 2 июнда “Техник жиҳатдан тартибга солиш соҳасида давлат бошқарувини тубдан такомиллаштириш тўғрисида” президент фармони, “Ўзбекистон Республикаси Инвестициялар ва ташқи савдо вазирлиги ҳузуридаги Ўзбекистон техник жиҳатдан тартибга солиш агентлиги фаолиятини ташкил этиш чора-тадбирлари тўғрисида” президент қарори имзоланганди.
Изоҳ (0)