Qurilish sohasida axborot-kommunikatsiya texnologiyalarini rivojlantirish markazi sohaviy qurilish-pudrat tashkilotlari reytingini e’lon qilgandi. Unda O‘zbekistonda faqat bitta kompaniya yuqori (75 foiz) ishonchlilik darajasiga ega deya ko‘rsatilgan. Qurilish va uy-joy kommunal xo‘jaligi vazirligi ushbu reyting sabab ijtimoiy tarmoqlarda bildirilgan tanqidlarga munosabat bildirdi.
Telegram’dagi “Troll.uz” loyihasi muallifi Qurilish va uy-joy kommunal xo‘jaligi vazirligiga videomurojaat yo‘llab, nima sababdan 100 foizli sifatni kafolatlay olmaydigan kompaniyalar qurilish ishlari bilan shug‘ullanayotgani to‘g‘risidagi savolni ko‘targan.
“Masalan, men choyxona ochdim. Vazirligingizning 10 nafar xodimi kelib, har biri somsa buyurdi. Men kelib, 10 tasidan faqat ikkitasi mazali bo‘ladi, qolgan 8 tasi uchun javob bermayman, dedim. Zaharlanib o‘lishingiz ham mumkin. Mana, qo‘limda SES bergan tegishli hujjat ham bor. Baribir somsa buyurtma berasizmi? Yo‘qmi?”, — deydi Umid G‘ofurov.
Vazirlik munosabatida keltirilishicha, qurilish tashkilotlarining reytingi — bu sohadagi yuridik maqomga ega soliq to‘lovchi tashkilotlarning sohaviy malaka tajribasidan kelib chiqadi. Bunda iqtisodiy-moliyaviy ko‘rsatkichlar, texnik imkoniyatlar, ishning sifati, mehnat xavfsizligi, boshqaruv va sifat standartlari hamda kadrlar siyosati kabi omillarga birlamchi eʼtibor qaratiladi. Inson omilining aralashuviga mutlaqo yo‘l qo‘yilmaydi. Bu jarayonlar idoralararo integratsiya qilingan hamda tashkilotlar o‘rtasida interpolyatsiya mezonlariga asoslangan onlayn baholab borish platformasi hisoblanadi.
“Biroq videomunosabatda tilga olingan guvohnoma olish masalasida baholash mezoni imtihon topshiruvchining bilimini baholaydi, xolos. Mantiq shundaki, reytingdagi baholash mezonining baʼzi bandlariga ko‘ra qurilish tashkiloti 100 foiz to‘plagani bilan boshqa bandlarga ko‘ra raqiblaridan zaif bo‘lishi mumkin. Aytaylik, qurilish tashkilotining soliq, mehnat, moliya va boshqa bir qator yo‘nalishlarda muammolari bo‘lgani uchun ballari avtomatik tarzda tushib ketishi mumkin. Bu faqatgina vazirlikning birlamchi baholashiga bog‘liq masala emas”, — deyiladi munosabatda.
Natijada qurilish tashkilotining umumlashgan balli keskin past ko‘rsatkichni qayd qiladi. Buni qurilish tashkilotining texnik salohiyati bilan qorishtirib yuborish xato. Qurilish tashkilotlarining reyting baholash tizimi interpolyatsiya asosida tashkil qilingan. Ball to‘plash jarayoni bir necha tashkilotlarning talabi bilan bog‘liq. Bunda hech qaysi tashkilot 100 foiz natijaga ega bo‘la olmaydi. Sababi har qanday tashkilotda ijobiy va salbiy xulosalar mavjud.
Qurilish vazirligi “somsaxona” masalasi haqida ham to‘xtalib, reyting baholash tizimi – bu mahsulot sifatini emas, balki “choyxona” faoliyatini yurituvchi yuridik shaxsning yuqorida sanab o‘tilgan talablarga muvofiqligini onlayn baholashini bildirgan.
“Bu tizimning yana bir qulayligi, odamlar qurilish tashkilotining salohiyatini uning reyting ko‘rsatkichlaridan ham bilib oladi. Bugun uy-joy qurilishi bozoridagi yirik tashkilotlar B toifadagi, yaʼni o‘rta va undan yuqori reytingga egaligini ko‘rishimiz mumkin.
Shu o‘rinda yana bir hayotiy haqiqatni ta’kidlash o‘rinli. Doim kuchlilarga nisbatan kuchsizroq bo‘lganlar, soddaroq aytsak, imkoniyati kamlar yaratgan mahsulot sifatsiz yoki yaroqsiz bo‘lavermaydi. Maktabda past bahoga o‘qigan o‘quvchi o‘g‘ri yoki muttaham bo‘lavermaydi, balki aksincha. Mahsulot sifatini unga qo‘yilgan talab, yaʼni standart belgilaydi, ishlab chiqaruvchining imkoniyati yoki salohiyati emas”, — deya ta’kidlanadi xabarda.
Izoh (0)