Qoraqalpog‘istondagi ayrim maktablarda o‘quvchilarga sifatsiz oziq-ovqat mahsulotlari berilgani aniqlandi, deb xabar beradi Jo‘qorg‘i Kenges matbuot xizmati.
Qayd etilishicha, Jo‘qorg‘i Kenges raisining topshirig‘iga ko‘ra, Kegeyli tumani Xalq ta‘limi bo‘limiga qarashli umumta‘lim maktablarida Sanitariya-epidemiologiya boshqarmasi xodimlari tomonidan tekshiruv o‘tkazilgan. Tekshiruv davomida 1, 8, 19 hamda 55-sonli maktablarda bir qancha qo‘pol xato-kamchiliklar aniqlangan.
Xususan, bolalarga berilayotgan oziq-ovqat mahsulotlari belgilangan meʼyorga javob bermasligi, shuningdek, ichimlik suvi bilan taʼminlanmagani, issiq choy bilan taʼminlash uchun esa sharoit to‘liq yaratilmagani maʼlum bo‘lgan.
“Eng achinarlisi, oziq-ovqat mahsulotlarining sifati o‘rganilganda olma sharbati isteʼmolga yaroqsiz ekani, qadoqlangan mahsulotlar zararkunandalar bilan zararlangani aniqlandi”, — deyiladi xabarda.
Bundan tashqari, mahsulotlar maxsus avtomashinalarda emas, yo‘lovchi transportida yetkazib berilgan, turli maktablarda kundalik oziq-ovqat sifatini nazorat qiluvchi komissiya tarkibi tuzilmagan.
Ta’kidlanishicha, hozirda o‘rganish jarayonida aniqlangan kamchiliklarni bartaraf etish, aybdorlarga chora ko‘rish bo‘yicha tegishli tartibda ishlar olib borilmoqda.
Maktab o‘quvchilarini bepul ovqat bilan ta’minlash tizimi dastlab Qoraqalpog‘iston va Xorazm viloyatida 2022-yil 1-aprelidan joriy etilgan. Prezidentning “2022—2026-yillarda xalq ta’limini rivojlantirish bo‘yicha milliy dasturni tasdiqlash to‘g‘risida”dagi farmoni, “Xalq ta’limini rivojlantirishga oid qo‘shimcha chora-tadbirlar to‘g‘risida”gi qaroriga muvofiq maktablarda o‘quvchilar bilan bog‘liq bir qator o‘zgarishlar yuz beradi. O‘quvchilarning qiziqish va qobiliyatlaridan kelib chiqqan holda ular kasbga yo‘naltiriladi va o‘qitiladi.
Izoh (0)