Қурилиш соҳасида ахборот-коммуникация технологияларини ривожлантириш маркази соҳавий қурилиш-пудрат ташкилотлари рейтингини эълон қилганди. Унда Ўзбекистонда фақат битта компания юқори (75 фоиз) ишончлилик даражасига эга дея кўрсатилган. Қурилиш ва уй-жой коммунал хўжалиги вазирлиги ушбу рейтинг сабаб ижтимоий тармоқларда билдирилган танқидларга муносабат билдирди.
Telegramъдаги “Тролл.уз” лойиҳаси муаллифи Қурилиш ва уй-жой коммунал хўжалиги вазирлигига видеомурожаат йўллаб, нима сабабдан 100 фоизли сифатни кафолатлай олмайдиган компаниялар қурилиш ишлари билан шуғулланаётгани тўғрисидаги саволни кўтарган.
“Масалан, мен чойхона очдим. Вазирлигингизнинг 10 нафар ходими келиб, ҳар бири сомса буюрди. Мен келиб, 10 тасидан фақат иккитаси мазали бўлади, қолган 8 таси учун жавоб бермайман, дедим. Заҳарланиб ўлишингиз ҳам мумкин. Мана, қўлимда СES берган тегишли ҳужжат ҳам бор. Барибир сомса буюртма берасизми? Йўқми?”, — дейди Умид Ғофуров.
Вазирлик муносабатида келтирилишича, қурилиш ташкилотларининг рейтинги — бу соҳадаги юридик мақомга эга солиқ тўловчи ташкилотларнинг соҳавий малака тажрибасидан келиб чиқади. Бунда иқтисодий-молиявий кўрсаткичлар, техник имкониятлар, ишнинг сифати, меҳнат хавфсизлиги, бошқарув ва сифат стандартлари ҳамда кадрлар сиёсати каби омилларга бирламчи эътибор қаратилади. Инсон омилининг аралашувига мутлақо йўл қўйилмайди. Бу жараёнлар идоралараро интеграция қилинган ҳамда ташкилотлар ўртасида интерполяция мезонларига асосланган онлайн баҳолаб бориш платформаси ҳисобланади.
“Бироқ видеомуносабатда тилга олинган гувоҳнома олиш масаласида баҳолаш мезони имтиҳон топширувчининг билимини баҳолайди, холос. Мантиқ шундаки, рейтингдаги баҳолаш мезонининг баъзи бандларига кўра қурилиш ташкилоти 100 фоиз тўплагани билан бошқа бандларга кўра рақибларидан заиф бўлиши мумкин. Айтайлик, қурилиш ташкилотининг солиқ, меҳнат, молия ва бошқа бир қатор йўналишларда муаммолари бўлгани учун баллари автоматик тарзда тушиб кетиши мумкин. Бу фақатгина вазирликнинг бирламчи баҳолашига боғлиқ масала эмас”, — дейилади муносабатда.
Натижада қурилиш ташкилотининг умумлашган балли кескин паст кўрсаткични қайд қилади. Буни қурилиш ташкилотининг техник салоҳияти билан қориштириб юбориш хато. Қурилиш ташкилотларининг рейтинг баҳолаш тизими интерполяция асосида ташкил қилинган. Балл тўплаш жараёни бир неча ташкилотларнинг талаби билан боғлиқ. Бунда ҳеч қайси ташкилот 100 фоиз натижага эга бўла олмайди. Сабаби ҳар қандай ташкилотда ижобий ва салбий хулосалар мавжуд.
Қурилиш вазирлиги “сомсахона” масаласи ҳақида ҳам тўхталиб, рейтинг баҳолаш тизими – бу маҳсулот сифатини эмас, балки “чойхона” фаолиятини юритувчи юридик шахснинг юқорида санаб ўтилган талабларга мувофиқлигини онлайн баҳолашини билдирган.
“Бу тизимнинг яна бир қулайлиги, одамлар қурилиш ташкилотининг салоҳиятини унинг рейтинг кўрсаткичларидан ҳам билиб олади. Бугун уй-жой қурилиши бозоридаги йирик ташкилотлар Б тоифадаги, яъни ўрта ва ундан юқори рейтингга эгалигини кўришимиз мумкин.
Шу ўринда яна бир ҳаётий ҳақиқатни таъкидлаш ўринли. Доим кучлиларга нисбатан кучсизроқ бўлганлар, соддароқ айтсак, имконияти камлар яратган маҳсулот сифатсиз ёки яроқсиз бўлавермайди. Мактабда паст баҳога ўқиган ўқувчи ўғри ёки муттаҳам бўлавермайди, балки аксинча. Маҳсулот сифатини унга қўйилган талаб, яъни стандарт белгилайди, ишлаб чиқарувчининг имконияти ёки салоҳияти эмас”, — дея таъкидланади хабарда.
Изоҳ (0)