AQSH Energetika vazirligi koronavirus pandemiyasiga virusning Xitoy laboratoriyasidan beixtiyor sizib chiqishi sabab bo‘lganini ma’lum qildi. Bu haqda Oq uy va Kongressga taqdim etilgan maxfiy razvedka hisobotiga tayanib, The Wall Street Journal xabar berdi.
Avvalroq virus qanday paydo bo‘lgani to‘g‘risida bir qarorga kelmagan AQSH Energetika vazirligi Milliy razvedka direktori Avril Xeynsning 2021-yilgi hujjatining yangilangan versiyasiga tayanib, aniq to‘xtamga keldi. Energetika vazirligi endilikda virus Xitoy laboratoriyasida sodir bo‘lgan baxtsiz hodisa natijasida tarqalganini aytib, Federal qidiruv byurosi fikriga qo‘shilgan. Boshqa to‘rt agentlik, milliy razvedka guruhi bilan bir qatorda, virus tabiiy yuqish natijasida paydo bo‘lgan deb hisoblaydi, ikkitasi esa hali qaror qabul qilmagan.
Energetika vazirligining xulosasi yangi razvedka ma’lumotlarini o‘z ichiga oladi va ahamiyatlidir. Chunki vazirlik muhim ilmiy tajribaga ega va AQSH milliy laboratoriyalari tarmog‘ini nazorat qiladi, ularning ba’zilari zamonaviy biologik tadqiqotlar olib boradi. Maxfiy hisobotni o‘qigan odamlarning so‘zlariga ko‘ra, Energetika vazirligi o‘z qarorini “past ishonch” bilan qabul qilgan.
Federal qidiruv byurosi (FQB) ham avvalroq virus laboratoriyadan sizib chiqish natijasida yuzaga kelganini ilgari surgan. FQB mikrobiologlar, immunologlarning butun jamoasi ma’lumotlariga tayanadi, shuningdek, Milliy sud-biologik tahlil markazi tomonidan qo‘llab-quvvatlanadi.
AQSH rasmiylari Energetika vazirligini o‘z pozitsiyasini o‘zgartirishga majbur qilgan so‘nggi razvedka va tahlillar tafsilotlarini berishdan bosh tortdi. Yangilangan hujjatda razvedka xodimlari hali ham Covid-19 qanday paydo bo‘lgani haqida ma’lumot to‘playotgani ta’kidlangan.
Izoh (0)