АҚШ Энергетика вазирлиги коронавирус пандемиясига вируснинг Хитой лабораториясидан беихтиёр сизиб чиқиши сабаб бўлганини маълум қилди. Бу ҳақда Оқ уй ва Конгрессга тақдим этилган махфий разведка ҳисоботига таяниб, The Wall Street Journal хабар берди.
Аввалроқ вирус қандай пайдо бўлгани тўғрисида бир қарорга келмаган АҚШ Энергетика вазирлиги Миллий разведка директори Аврил Хейнснинг 2021 йилги ҳужжатининг янгиланган версиясига таяниб, аниқ тўхтамга келди. Энергетика вазирлиги эндиликда вирус Хитой лабораториясида содир бўлган бахтсиз ҳодиса натижасида тарқалганини айтиб, Федерал қидирув бюроси фикрига қўшилган. Бошқа тўрт агентлик, миллий разведка гуруҳи билан бир қаторда, вирус табиий юқиш натижасида пайдо бўлган деб ҳисоблайди, иккитаси эса ҳали қарор қабул қилмаган.
Энергетика вазирлигининг хулосаси янги разведка маълумотларини ўз ичига олади ва аҳамиятлидир. Чунки вазирлик муҳим илмий тажрибага эга ва АҚШ миллий лабораториялари тармоғини назорат қилади, уларнинг баъзилари замонавий биологик тадқиқотлар олиб боради. Maxфий ҳисоботни ўқиган одамларнинг сўзларига кўра, Энергетика вазирлиги ўз қарорини “паст ишонч” билан қабул қилган.
Федерал қидирув бюроси (ФҚБ) ҳам аввалроқ вирус лабораториядан сизиб чиқиш натижасида юзага келганини илгари сурган. ФҚБ микробиологлар, иммунологларнинг бутун жамоаси маълумотларига таянади, шунингдек, Миллий суд-биологик таҳлил маркази томонидан қўллаб-қувватланади.
АҚШ расмийлари Энергетика вазирлигини ўз позициясини ўзгартиришга мажбур қилган сўнгги разведка ва таҳлиллар тафсилотларини беришдан бош тортди. Янгиланган ҳужжатда разведка ходимлари ҳали ҳам Cовид-19 қандай пайдо бўлгани ҳақида маълумот тўплаётгани таъкидланган.
Изоҳ (0)