Rossiyaning Novgorod viloyatidagi M-11 federal magistral yo‘lida 42 ta mashina to‘qnashishi oqibatida yirik YTH sodir bo‘ldi. Bu haqda “RIA Novosti” xabar berdi.
Hodisa oqibatida bir kishi halok bo‘ldi, besh kishi jarohat oldi va kasalxonaga yotqizildi. YTH qor bilan qoplangan M-11 “Neva” federal avtomagistralida ikkita yuk mashinasining to‘qnashuvi bilan boshlangan. Shundan so‘ng orqadan kelayotgan mashinalar to‘qnashgan. Tirbandlik bir necha kilometrga cho‘zilgan. Moskvaga olib boruvchi yo‘l to‘sib qo‘yilgan. Hodisa mahalliy vaqt bilan soat 11:20 da sodir bo‘lgan. Qutqaruv ishi kuchli qor yog‘ishi va bo‘ron tufayli murakkablashmoqda, bundan tashqari, yuk mashinalaridan biridan bitum oqib chiqmoqda.
“M-11 avtomagistralida to‘rt kilometrlik tirbandlik yuzaga keldi. Vaziyat yuk mashinalarining aylana olmayotgani sababli og‘irlashmoqda. Hozirda YTHda 42 ta mashina ishtirok etgani qayd etildi. Hujjatlar rasmiylashtirilmoqda, buning uchun bir necha kun kerak bo‘ladi. Chunki avariya ishtirokchilari ko‘p”, — deyiladi rasmiy xabarda.
YTHning barcha ishtirokchilari yo‘l inspektorlari tomonidan ro‘yxatga olinmagunicha, avtomobil yo‘li ochilmaydi. Moskva yo‘nalishidagi federal magistralda harakat to‘sib qo‘yilgan. Boshqa yo‘llar bo‘ylab aylanma yo‘l tashkil qilingan, ammo hozir u yerda ham tirbandlik yuzaga kelgan. Chunki u yo‘llar ham qordan tozalanmagan. YTH yuzasidan jinoiy ish ochilgan.
Izoh (0)