Tirilib kelib, tenderni yutgan korxona, o‘zaro afillangan tadbirkorlar, 15 ta mahalla uchun quyosh panellari — 25-fevral tenderlari tafsiloti

25-fevral kuni O‘zbekiston Respublikasi tovar-xomashyo birjasida 50 dan ortiq tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.

Tenderni amalda faoliyatini tugatgan korxona yutib oldi

Toshkent viloyati Yangiobod tumani maktabgacha ta’lim bo‘limi muassasaga mebel jihozlari xarid qilish uchun tender o‘tkazdi. Tenderning boshlang‘ich narxi — 90 million so‘m.

Unda ikkita korxona: Universe Build va Delta Smart MCHJlar qatnashdi. Komissiya a’zolarining yakuniy natijalariga ko‘ra, taqriban 85 ball yiqqan Universe Build g‘alaba qozondi, Delta Smart esa zaxira g‘olib deb topildi.

Ochiq ma’lumotlarni kuzatish jarayonida qiziq holatga duch keldik. Ya’ni, Statistika agentligiga ishonadigan bo‘lsak, tenderni yutib olgan Universe Build amalda faoliyatini to‘xtatgan.

Tadbirkorlik subyekti rahbari Tojiboyev Nuriddinning boshqa tashkilotlarga aloqadorligi bo‘yicha ma’lumotlar topilmadi.

15 ta mahalla uchun quyosh panellari

Toshkent viloyati Bekobod shahri mahalla va oilani qo‘llab-quvvatlash bo‘limi umumiy boshlang‘ich qiymati 450 million so‘m (har biri 30 million so‘mdan) bo‘lgan naq 15 ta tender o‘tkazdi. Bundan maqsad — shahardagi mos ravishda 15 ta tumanga quyosh panellari o‘rnatish.

Tenderda uchta tadbirkorlik subyekti ishtirok etdi: Art-Home-Servis, Everest Gold Stroy va Bekobod-Perfect-Group MCHJlar. Korxonalar munosib raqobat taqdim etganiga qaramay (uchala ishtirokchi ham tenderlarda 90 dan yuqori ballar to‘plagan), ularning 13 tasini Art-Home-Servis yutib ketdi. Shartnoma summasi 29 million 490 ming so‘mga kelishildi.

Qolgan ikkita tender esa Everest Gold Stroy’ga nasib etdi. U shartnomani 29 million 971 ming so‘mdan pastga tushirmadi.

Tadbirkorlik subyektlari rahbarlari o‘rtasida afillanganlik holatlari, g‘olib ishtirokchilar va komissiya a’zolari o‘rtasida yaqin qarindoshlik aloqalari haqida ma’lumot aniqlanmadi.

O‘zaro aloqador tadbirkorlarning “raqobati”

Sudlar faoliyatini ta’minlash departamenti Namangan viloyati hududiy bo‘limi kompyuterlar, printer, shaxsiy va uy-ro‘zg‘or buyumlarini ta’mirlash xizmati uchun boshlang‘ich narxi 14 million 300 ming so‘m bo‘lgan tender o‘tkazdi. Unda New-Supplier va Magic Star MCHJlar ishtirok etdi.

Xarid komissiyasi a’zolarining yakuniy baholariga ko‘ra, tenderni 98 ball bilan Magic Star yutib olgan. 91 ball to‘plagan New-Supplier esa zaxira g‘olib sifatida ikkinchi o‘rinni egallagan.

Tender ishtirokchilarining rahbariyati bilan tanishamiz.

Unga ko‘ra, g‘olib MCHJning ta’sischilari Ubaydullayev Azim Hasanovich va Nasriddinov Xayrullo Hamidullayevich hisoblanadi.

Zaxira g‘olibning ta’sischisi Boltaboyeva Shahlo Mo‘minqulovna. Rahbari esa Davlataliyev Abdumo‘min Tursunpo‘latich.

Ushbu tadbirkorlarning boshqa bizneslari, tenderda ishtirok etmagan, lekin ularga aloqador bo‘lgan korxonalarni ko‘zdan kechiramiz.

Ochiq ma’lumotlarga ko‘ra, Magic Star MCHJ rahbari bo‘lgan Azim Ubaydullayev Magic Sales nomli MCHJ ta’sischilaridan biri ham hisoblanadi. E’tiborlisi, xuddi shu kompaniya rahbari — tenderda Azim Ubaydullayevga yutqazgan New-Supplier’ning rahbari Abdumo‘min Davlataliyev.

Bundan tashqari, Magic Star’ning boshqa ta’sischisi Xayrullo Nasriddinov aloqador bo‘lgan korxonalar qatorida yana bir tanish nomni ko‘rdik — Magic Star Plus Servis.

Xayrullo Nasriddinov bu korxonaning 100 foizlik ta’sischisi hisoblanadi. Rahbari esa... uning tenderdagi “raqibi” bo‘lgan yana o‘sha Abdumo‘min Davlataliyev.

Mas’ullardan ushbu shubhali tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.