Тирилиб келиб, тендерни ютган корхона, ўзаро афилланган тадбиркорлар, 15 та маҳалла учун қуёш панеллари — 25 февраль тендерлари тафсилоти

25 февраль куни Ўзбекистон Республикаси товар-хом ашё биржасида 50 дан ортиқ тендерлар амалга оширилди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.

Тендерни амалда фаолиятини тугатган корхона ютиб олди

Тошкент вилояти Янгиобод тумани мактабгача таълим бўлими муассасага мебел жиҳозлари харид қилиш учун тендер ўтказди. Тендернинг бошланғич нархи — 90 миллион сўм.

Унда иккита корхона: Universe Build ва Delta Смарт МЧЖлар қатнашди. Комиссия аъзоларининг якуний натижаларига кўра, тақрибан 85 балл йиққан Universe Build ғалаба қозонди, Delta Смарт эса захира ғолиб деб топилди.

Очиқ маълумотларни кузатиш жараёнида қизиқ ҳолатга дуч келдик. Яъни, Статистика агентлигига ишонадиган бўлсак, тендерни ютиб олган Universe Build амалда фаолиятини тўхтатган.

Тадбиркорлик субъекти раҳбари Тожибоев Нуриддиннинг бошқа ташкилотларга алоқадорлиги бўйича маълумотлар топилмади.

15 та маҳалла учун қуёш панеллари

Тошкент вилояти Бекобод шаҳри маҳалла ва оилани қўллаб-қувватлаш бўлими умумий бошланғич қиймати 450 миллион сўм (ҳар бири 30 миллион сўмдан) бўлган нақ 15 та тендер ўтказди. Бундан мақсад — шаҳардаги мос равишда 15 та туманга қуёш панеллари ўрнатиш.

Тендерда учта тадбиркорлик субъекти иштирок этди: Арт-Home-Сервис, Эверест Gold Stroy ва Бекобод-Перфеcт-Group МЧЖлар. Корхоналар муносиб рақобат тақдим этганига қарамай (учала иштирокчи ҳам тендерларда 90 дан юқори баллар тўплаган), уларнинг 13 тасини Арт-Home-Сервис ютиб кетди. Шартнома суммаси 29 миллион 490 минг сўмга келишилди.

Қолган иккита тендер эса Эверест Gold Stroyъга насиб этди. У шартномани 29 миллион 971 минг сўмдан пастга туширмади.

Тадбиркорлик субъектлари раҳбарлари ўртасида афилланганлик ҳолатлари, ғолиб иштирокчилар ва комиссия аъзолари ўртасида яқин қариндошлик алоқалари ҳақида маълумот аниқланмади.

Ўзаро алоқадор тадбиркорларнинг “рақобати”

Судлар фаолиятини таъминлаш департаменти Наманган вилояти ҳудудий бўлими компьютерлар, принтер, шахсий ва уй-рўзғор буюмларини таъмирлаш хизмати учун бошланғич нархи 14 миллион 300 минг сўм бўлган тендер ўтказди. Унда New-Супплиэр ва Magic Стар МЧЖлар иштирок этди.

Харид комиссияси аъзоларининг якуний баҳоларига кўра, тендерни 98 балл билан Magic Стар ютиб олган. 91 балл тўплаган New-Супплиэр эса захира ғолиб сифатида иккинчи ўринни эгаллаган.

Тендер иштирокчиларининг раҳбарияти билан танишамиз.

Унга кўра, ғолиб МЧЖнинг таъсисчилари Убайдуллаев Азим Ҳасанович ва Насриддинов Хайрулло Ҳамидуллаевич ҳисобланади.

Захира ғолибнинг таъсисчиси Болтабоева Шаҳло Мўминқуловна. Раҳбари эса Давлаталиев Абдумўмин Турсунпўлатич.

Ушбу тадбиркорларнинг бошқа бизнеслари, тендерда иштирок этмаган, лекин уларга алоқадор бўлган корхоналарни кўздан кечирамиз.

Очиқ маълумотларга кўра, Magic Стар МЧЖ раҳбари бўлган Азим Убайдуллаев Magic Салес номли МЧЖ таъсисчиларидан бири ҳам ҳисобланади. Эътиборлиси, худди шу компания раҳбари — тендерда Азим Убайдуллаевга ютқазган New-Супплиэрънинг раҳбари Абдумўмин Давлаталиев.

Бундан ташқари, Magic Старънинг бошқа таъсисчиси Хайрулло Насриддинов алоқадор бўлган корхоналар қаторида яна бир таниш номни кўрдик — Magic Стар Plus Сервис.

Хайрулло Насриддинов бу корхонанинг 100 фоизлик таъсисчиси ҳисобланади. Раҳбари эса... унинг тендердаги “рақиби” бўлган яна ўша Абдумўмин Давлаталиев.

Масъуллардан ушбу шубҳали тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.