Rossiyaning Leningrad viloyati Kudrovo shahridagi qurilish maydonchasida ikki nafar mehnat migranti halok bo‘ldi. Ulardan biri o‘zbekistonlik, deb xabar beradi “Fontanka” nashri.
Qayd etilishicha, fojia 21-fevral kuni soat 20:00 atrofida sodir bo‘lgan. Qurilish maydonchasi qo‘riqchisi obyektni ko‘zdan kechirayotganida shovqin-suronni eshitgan. So‘ngra yerga qulab tushgan fasad ishlari kranini ko‘rib qolgan. Uning ichida bo‘lgan 20 yoshli O‘zbekiston fuqarosi va Tojikistonda tug‘ilgan 18 yoshli yigit halok bo‘lgan.
Leningrad viloyati prokuraturasi mehnatni muhofaza qilish qonunchiligiga rioya etilishi bo‘yicha tekshiruv boshlagan.
2022-yil dekabr oxirlarida Leningrad viloyati Vsevolojsk tumanida 25 yoshli o‘zbekistonlik quruvchi balandlikdan qulab halok bo‘lgandi. Shuningdek, 12-dekabr kuni ham Sankt-Peterburgda o‘zbekistonlik ishchi 7-qavatdan qulab halok bo‘lgan. Marhum 45 yoshda bo‘lgan va olgan tan jarohatlari tufayli voqea joyida halok bo‘lgan. Holat yuzasidan jinoiy ish qo‘zg‘atilgan. Hozirda tergov harakatlari olib borilmoqda, hodisaning barcha holatlari o‘rganilmoqda.
Izoh (0)