Россиянинг Ленинград вилояти Кудрово шаҳридаги қурилиш майдончасида икки нафар меҳнат мигранти ҳалок бўлди. Улардан бири ўзбекистонлик, деб хабар беради “Фонтанка” нашри.
Қайд этилишича, фожиа 21 февраль куни соат 20:00 атрофида содир бўлган. Қурилиш майдончаси қўриқчиси объектни кўздан кечираётганида шовқин-суронни эшитган. Сўнгра ерга қулаб тушган фасад ишлари кранини кўриб қолган. Унинг ичида бўлган 20 ёшли Ўзбекистон фуқароси ва Тожикистонда туғилган 18 ёшли йигит ҳалок бўлган.
Ленинград вилояти прокуратураси меҳнатни муҳофаза қилиш қонунчилигига риоя этилиши бўйича текширув бошлаган.
2022 йил декабрь охирларида Ленинград вилояти Всеволожск туманида 25 ёшли ўзбекистонлик қурувчи баландликдан қулаб ҳалок бўлганди. Шунингдек, 12 декабрь куни ҳам Санкт-Петербургда ўзбекистонлик ишчи 7-қаватдан қулаб ҳалок бўлган. Марҳум 45 ёшда бўлган ва олган тан жароҳатлари туфайли воқеа жойида ҳалок бўлган. Ҳолат юзасидан жиноий иш қўзғатилган. Ҳозирда тергов ҳаракатлари олиб борилмоқда, ҳодисанинг барча ҳолатлари ўрганилмоқда.
Изоҳ (0)