Moskvada sodir bo‘lgan yong‘inda 2 nafar O‘zbekiston fuqarosi vafot etdi

Moskva shahridagi mehnat migrantlari yashagan xostelda yong‘in sodir bo‘lgan. Tashqi mehnat migratsiyasi agentligi voqea yuzasidan axborot berdi.

Tashqi mehnat migratsiyasi agentligining Moskva shahridagi vakolatxonasi tegishli tashkilotlar bilan hamkorlikda ushbu hodisa yuzasidan o‘rganish ishlarini boshladi.

Ma’lum bo‘lishicha, joriy yil 28-iyuldan 29-iyulga o‘tar kechasi Alma-Atinskaya ko‘chasidagi 7-korpus, 2-uyda joylashgan xostelda sodir bo‘lgan yong‘in oqibatida 8 nafar fuqaro vafot etgan va 4 nafar fuqaro jarohat olgan.

Dastlabki ma’lumotlarga ko‘ra, vafot etganlarning 2 nafari (2003-yilda tug‘ilgan S.N. va 1986-yilda tug‘ilgan A.A.) O‘zbekiston fuqarolari hisoblanadi.

Ushbu hodisa yuzasidan Brateyevo tumani tergov qo‘mitasi tomonidan jinoyat ishi qo‘zg‘atilgan va hozirgi vaqtda tergov harakatlari olib borilmoqda.