Истанбул мэри ҳокими Экрем Имомўғли тез сканерлаш усули ёрдамида қулаш хавфи юқори деб таснифланган уйларни бузиш жараёни бошлангани ҳақида маълум қилди.
“Бу жараённи тезлаштириш ва рағбатлантириш мақсадида хавфли бинолардаги хонадонлар учун қўшимча 4,5 минг лира ажратамиз. Мен барчани бу борада жиддий ҳамкорликка таклиф қиламан”, — дея қўшимча қилди у.
Ўтган ҳафтанинг охирида, 17 февраль куни Истанбул маъмурияти зилзила содир бўлса бир зумда қулаши мумкин бўлган 318 та бинони санаб чиққанди. Уларда 10 минг киши истиқомат қилади. “Яна 1 525 та бино D ва E тоифаларига тегишли – юқори хавфда. Биз биринчи навбатда 318 та бино учун режа тайёрладик, уларда 10 минг киши истиқомат қилади — уйлар эвакуация қилинади, квартира эгаларига квартира ижараси учун компенсация тўланади”, — деди Истанбул бош котиби ёрдамчиси Бугра Гюкче.
Унинг қўшимча қилишича, шаҳарда тўртинчи йилдирки Техник университет билан ҳамкорликда 90 кун ичида уйнинг барқарорлигини баҳолаш бепул дастури амалга оширилмоқда. Уч йил ичида расмий идораларга 30 мингга яқин мурожаат келиб тушган бўлса, 6 февралдаги зилзиладан бери деярли 40 минг ариза келиб тушди, дейди у.
Февраль ойи бошидан бери Туркияда бир неча кучли зилзилалар содир бўлди. Биринчи кучли зилзила юз берган 6 февралдан бери 7 000 дан ортиқ ер силкинишлари қайд этилган. 20 февраль оқшомида Туркиянинг жануби-шарқида, Хатайда иккита янги зилзила юз берди.
Табиий офатда Туркиянинг ўзида 43 мингдан ортиқ одам ҳалок бўлди, кўплаб уйлар қулаб тушди. Туркия прокурорлари вайрон бўлган уйлар қоидабузарликлар билан қурилганини, хусусан, бетон таркибидаги қум ва шағал талабларга жавоб бермаслигини таъкидлади.
Изоҳ (0)