Buyuk Britaniya, Germaniya, Italiya, Kanada, Fransiya, Yaponiya va AQSHni o‘z ichiga olgan Katta yettilik davlatlari Ukrainaga 39 milliard dollar moliyaviy yordam jo‘natish niyatida ekanliklarini ma’lum qildi. Bu haqda “Kommersant” xabar bermoqda.
Qaror Hindistonning Bangalor shahrida bo‘lib o‘tgan Katta yettilik mamlakatlari moliya vazirliklari va markaziy banklari rahbarlarining yig‘ilishi yakunlari bo‘yicha qabul qilindi.
“Ushbu qo‘llab-quvvatlash Ukrainaga ishonch bag‘ishlaydi va hokimiyatga davlat faoliyatini kafolatlash, asosiy xizmatlarni ko‘rsatishni davom ettirish, muhim infratuzilmani taʼmirlash va iqtisodiyotni barqarorlashtirish imkonini beradi”, — deyiladi Yaponiya Moliya vazirligi saytida chop etilgan qo‘shma bayonotda.
Bayonotda tashkilot mamlakatlari tomonidan Ukrainani qo‘llab-quvvatlash bo‘yicha boshqa chora-tadbirlar, jumladan, qurol-yarog‘ yetkazib berish, ukrainalik harbiylarni o‘qitish va gumanitar yordam ko‘rsatilgan.
Yaponiya moliya vaziri Shunichi Suzuki yig‘ilishdan so‘ng jurnalistlarga “Katta yettilik” davlatlari ham keyingi cheklovlar to‘g‘risida qaror qabul qilish uchun Rossiyaga qarshi sanksiyalar samaradorligini tahlil qilishlari kerakligini aytdi.
Rossiya va Ukraina o‘rtasida urush boshlanganidan keyin G7 davlatlari Ukrainaga muntazam ravishda moliyaviy yordam va qurol-yarog‘ jo‘natib turdi.
20-fevral kuni 2023-yilda G7 ga raislik qiladigan Yaponiya Ukrainaga 5,5 milliard dollar yordam berishi ma’lum bo‘ldi.
AQSH Kiyevga kamida 13 milliard dollar ajratdi. Katta yettilik tashqi ishlar vazirlari Rossiyaga nisbatan sanksiyalar bosimini oshirishga va’da berishdi.
Izoh (0)